Թուրքիայի արտաքին սահմանների պաշտպանությունը առաջնային խնդիր է ԵՄ-ի համար. Գերմանիա
Եվրամիության երկրների համար միգրացիոն ճգնաժամի լուծման հարցում առաջնային է Թուրքիայի հետ արտաքին սահմանների պաշտպանությունը, ARD հեռուստաընկերության հետ զրույցում հայտարարել է Գերմանիայի ներքին գործերի նախարար Թոմաս դե Մեզյերը:
«Բոլոր երկրները համաձայն են, որ Թուրքիայի հետ արտաքին սահմանների պաշտպանությունն առաջնային խնդիր է: Դա ներառում է և´ Frontex-ի (ԵՄ սահմանային գործակալություն) մասնակցություն, և´ ՆԱՏՕ-ի ավանդ, դա նաև նշանակում է, որ փախստականներին անհրաժեշտ կլինի հետ ուղարկել Թուրքիա»,- ասել է նա՝ հավելելով, թե մոտակա երկու շաբաթները ցույց կտան, թե որքանով են այդ միջոցառումներն արդյունավետ:
Նրա խոսքով՝ «որոշակի հանգամանքների դեպքում» կարող է անհրաժեշտ լինել պաշտպանություն նաև «Շենգենյան գոտու մյուս սահմաններում»: Նա նաև նշել է, որ Գերմանիան երկարաժամկետ հեռանկարում մտադիր չէ հանդուրժել մյուս երկրների փորձերը՝ «իրենց խնդիրները լուծել՝ պատասխանատվությունը գցելով Գերմանիայի ուսերին»:
