![](/banners/BeFunky-design.jpg)
Ադրբեջանն ու Հունգարիան Ռամիլ Սաֆարովի գործով ճանաչվել են որպես պատասխանող կողմ. Եվրոպական դատարան
![](https://168.am/wp-content/uploads/2012/09/Gurgen-Margaryan04-e1346503964387.jpg)
Ադրբեջանի ու Հունգարիայի կառավարությունները Մարդու իրավունքների եվրոպական դատարանի կողմից ճանաչվել են որպես պատասխանող կողմ հայ սպա Գուրգեն Մարգարյանի հարազատների հայցի համաձայն, որը սպանվել էր Բուդապեշտում ադրբեջանցի Ռամիլ Սաֆարովի կողմից 2004-ին: Այս մասին տեղեկացնում է Middlesex University-ում տեղակայված Մարդու իրավունքների եվրոպական փաստաբանական կենտրոնը (European Human Rights Advocacy Centre)։
Նշվում է, որ Բուդապեշտում երկու սպաներն էլ մասնակցել են անգլերեն լեզվի դասընթացների՝ ՆԱՏՕ-ի ծրագրի շրջանակում: 2004 թվականի փետրվարի 19-ին ադրբեջանցին կացնահարել է հայ սպային անկողնում:
2006թ. ապրիլի 3-ին Բուդապեշտի դատարանը Սաֆարովին դատապարտում է ցմահ ազատազրկման` 30 տարվա ընթացքում առանց ներման իրավունքի: 2012թ. օգոստոսի 31-ին Հունգարիայի արդարադատության նախարարությունը ցմահ ազատազրկման դատապարտված Սաֆարովին արտահանձնում է Ադրբեջանին, որտեղ նրան ընդունում է Ադրբեջանի նախագահ Իլհամ Ալիևն ու ազատություն շնորհում:
Նրա ծառայողական աստիճանը բարձրացվում է, նրան շնորհվում է բնակարան ու 8 տարվա աշխատավարձը:
2012թ. դեկտեմբերի 12-ին հրապարակված զեկույցում Հունգարիայի օմբուդսմենը քննադատում է Հունգարիայի կառավարության՝ Սաֆարովին արտահանձնելու այդ քայլը:
ՄԻԵԴ-ը ադրբեջանական ու հունգարական կողմերից պահանջում է պաշտոնապես պատասխանել սպանված հայ սպայի իրավահաջորդների հայցին։ Նշվում է, որ զոհի հարազատները պնդում են, որ Գուրգեն Մարգարյանի կյանքի իրավունքը (Մարդու իրավունքների եվրոպական կոնվենցիա, 2-րդ հոդված) խախտվել է Ադրբեջանի կողմից:
Բացի այդ՝ Գուրգեն Մարգարյանի իրավահաջորդները մեղադրում են Հունգարիային, որը խախտել է Կոնվենցիան՝ թույլատրելով Սաֆարովի արտահանձնումը: Երկու կառավարությունները պետք է պատասխան տան մայիսին Ստրասբուրգի դատարանում:
Գուրգեն Մարգարյանի ու մահափորձի ենթարկված սպա Հայկ Մակուչյանի ներկայացուցիչների շահերը ՄԻԵԴ-ում ներկայացնում են Մարդու իրավունքների եվրոպական փաստաբանական կենտրոնը, Legal Guide հայկական ՀԿ-ն ու Գուրգեն Մարգարյանի ընտանիքի շահերի ներկայացուցիչ, փաստաբան Նազելի Վարդանյանը: