Ավստրիան ու Գերմանիան կոչ են արել Հունաստանին ուժեղացնել ԵՄ սահմանների պահպանությունը
Եվրոպայում միգրացիոն ճգնաժամի ֆոնին Գերմանիան ու Ավստրիան ուժեղացնում են ճնշումը Հունաստանի վրա՝ կոչ անելով վերջինիս ավելի արդյունավետորեն պահպանել Եվրամիության սահմանները, տեղեկացնում է korrespondent.net-ը:
«Մեզ հարկավոր է արդեն մոտակա շաբաթներին հասնել կայունության ու փախստականների հոսքի զգալի նվազման: Եվրամիությունը պետք է ճնշում գործադրի Հունաստանի վրա, որպեզի ստիպի նրան կատարել իր տնային աշխատանքը: Մեր ժամանակն սպառվում է»,- հայտարարել է Գերմանիայի ՆԳՆ ղեկավար Թոմաս դե Մեզյերն այսօր՝ մասնակցելով Ամստերդամում ԵՄ ՆԳՆ երկրների ղեկավարների համաժողովին:
Միաժամանակ, նախարարը հնարավոր է համարել Հունաստանի հեռացումը Շենգենյան գոտուց: Ավելի վաղ նման սպառնալիքով էր հանդես եկել Ավստրիան: Ավստրիայի ՆԳՆ ղեկավար Յահաննա Միքլ-Լյայտները, Ամստերդամում հանդես գալով ելույթով, միֆ է համարել այն պնդումները, թե հույն-թուրքական սահմանները իբր հնարավոր չէ արդյունավետորեն հսկել:
«Հունաստանն ունի Եվրոպայի խոշորագույն ռազմածովային ուժերը: Եթե չպաշտպանենք այդ սահմանը, ապա Շենգենյան գոտին կտեղափոխվի Կենտրոնական Եվրոպայի ուղղությամբ»,- ասել է նա՝ կոչ անելով, որ Հունաստանն իր ռազմածովային ուժերը կիրառի սահմանները պաշտպանելու համար:
