Թբիլիսիում գրանցվել է H1N1 վիրուսից մահացության առաջին դեպքը
Թբիլիսիում վերջին օրերին գրանցվել է այս տարվա մեջ առաջին մահացության դեպքը H1N1 վիրուսից, որը հայտնի է նաև «խոզի գրիպ» անվանմամբ, հայտնում է «Գրուզիա օնլայնը»՝ հղում կատարելով Վրաստանի հիվանդությունների վերահսկման ու հասարակական առողջության ազգային կենտրոնին:
Վերջինիս տվյալով՝ վիրուսից մահացել է 39-ամյա մի տղամարդ: Հիվանդը Թբիլիսի էր տեղափոխվել Արևմտյան Վրաստանից:
Դրա հետ միասին, ինչպես պնդում են վրացի մասնագետները, այս փուլում Վրաստանում չկա համաճարակի վտանգ:
«Մենք հիվանդության տարածում ենք ակնկալում փետրվարին, թեև ոչ այն աստիճանի, որ մոտենանք համաճարակային սահմանին»,- նշում են բժիշկները:
Հիշեցնենք, որ H1N1-ով հիվանդության դեպքեր Վրաստանում գրանցվում են 2009թ. հուլիսից: Մինչ օրս այդ հիվանդությունից մահացել է 39 մարդ:
