«Միայն Սերժ Սարգսյանի հետևից գալուց հետո ԱԱԾ-ն իմ հետևից կգա». Աշոտ Մանուչարյանը՝ ԱԱԾ-ի հաղորդագրության մասին
«Զարմացա, որ պատասխանը հենց ԱԱԾ-ից եղավ, որովհետև բարձրացրած հարցերս ճնշող մեծամասնությամբ ուղղված էին երկրի քաղաքական ղեկավարությանը, կարծում եմ, այս հայտարարությունը հենց երկրի ղեկավարությունից էլ գրված է, ու ստորագրվել է ԱԱԾ-ի կողմից»,- այսօր լրագրողների հետ հանդիպման ժամանակ այս մասին ասաց «Ղարաբաղ» կոմիտեի անդամ Աշոտ Մանուչարյանը: Ինչպես հայտնի է, ԱԱԾ-ն օրերս արձագանքել էր Աշոտ Մանուչարյանի՝ հարցազրույցում արված հայտարարություններին:
«Կարծում ենք՝ արկածախնդրություն որակումն առավել քան հարիր է հենց Աշոտ Մանուչարյանի նշյալ ելույթին, որն ամբողջությամբ հիմնված է անձնական, կողմնակալ, զգայական ենթադրությունների, մեկնաբանությունների և դրանց իսկ վրա կառուցված հետևությունների վրա»,- նշված էր ԱԱԾ-ի հաղորդագրության մեջ:
«Ես Սահմանադրության անցկացման հարցն այս ծանր իրավիճակում գնահատել էի՝ որպես քայքայիչ գործողություն՝ ընդդեմ երկրի: Ասել էի, որ անթույլատրելի է, որ անփորձ զինվորականներ են կանգնած սահմանում, ճիշտ կլինի՝ մասնագետներ կանգնած լինեն: Մեկ խնդիր կար ինչ-որ չափով առնչվող ԱԱԾ-ին, բայց այստեղ էլ խնդիրը վերաբերում էր քաղաքական պատվերին, թե ինչ քաղաքական պատվեր է տրված եղել:
Խումբը վաղուց վերահսկողության տակ էր վերցված եղել, ամիսներ շարունակ նրանց հետևել են: Նախագահի նստավայրից որոշել են ստեղծվածով քաղաքական գործընթաց կազմակերպել, քաղաքական ինֆորմացիոն պատերազմ են տանում, գործը ծառայեցնում են ներքին քաղաքական հարցերը լուծելուն: Ասել էի՝ հարյուրավոր, հիմա կասկածում եմ, որ հազարավոր մարդիկ մասնակից են այդ պտույտներին»,- ասաց նա:
Ա. Մանուչարյանն իր խոսքերով՝ մի պրոֆեսիոնալ հարց ուղղեց ԱԱԾ-ին. Ո՞ր պահից է օպերատիվ ծառայությունը սկսել այդ երիտասարդի՝ Արթուր Վարդանյանի բացահայտումը և հետևումը. «Եթե որևէ հատուկ ծառայություն երկրում պատրաստում է քայքայիչ գործողություններ, դրանից առաջ թողնում է չխկչխկան-դխկդխկան օպերացիայով, ինչպես այսօր Հայաստանն է զբաղված, ու դրա քողի ներքո անեն իրենց պրոֆեսիոնալ գործը: Ինձ թվում է՝ երկրի հանձնարարականով ԱԱԾ-ն նրանց պահում է, որ կարողանա օգտագործել ներքին քաղաքական նպատակների համար»:
Հարցին՝ հնարավո՞ր է՝ ԱԱԾ-ն Ձեր հետևից էլ գա, Ա. Մանուչարյանն այսպես պատասխանեց. «Կարծում եմ՝ միայն Սերժ Սարգսյանի հետևից գալուց հետո՝ իմ հետևից կգան: Աստված գիտի՝ ում հետևից՝ ով կգա, ու ինչ մեղադրանքով, պետք չէ նպաստավոր պայմաններ ստեղծել նրանց համար: Ուզում եմ ասել, եթե փորձում եք կանխագուշակել, ամեն ինչ էլ կարող եք կանխագուշակել»:
