ԴԱԻՇ-ի զինյալները միաժամանակ հարձակվել են Իրաքի հյուսիսում գտնվող երեք քաղաքների վրա
ԴԱԻՇ-ի զինյալներն իրականացրել են վերջին 5 ամսում առաջին լուրջ ռազմական օպերացիան Իրաքում, հայտնում է BBC-ն:
Ինչպես հայտնել է Իրաքում ամերիկյան ցամաքային խմբի հրամանատար, բրիգադային գեներալ Մարկ Օդոմը, ԴԱԻՇ-ի հարյուրավոր զինյալներ գրոհել են Իրաքի հյուսիսում՝ Մոսուլից արևելք ընկած երեք քաղաքները:
Հարձակումները հետ են մղվել քրդական «Փեշմեգայի» զինյալների կողմից, որոնց աջակցել է ԱՄՆ-ի ավիացիան:
Քրդերի ներկայացուցիչները հայտնում են, որ իսլամիստների հարձակումները հետ մղելիս սպանվել են տասնյակ քուրդ աշխարհազորայիններ:
Վերջին շրջանում ԴԱԻՇ-ը Իրաքում անհաջողություններ էր կրում՝ անցած ամիս ջիհադիստները կորցրել էին վերահսկողությունը Սինջար քաղաքի նկատմամբ, իսկ օրեր առաջ իրաքյան զորքերը հայտարարել էին Ռամադի քաղաքի ազատագրման մասին, որը գտնվում է երկրի արևմուտքում:
