Էրդողանը հայտարարել է երկրում երկու հանրաքվե անցկացնելու մասին
Թուրքիայում կարող է անցկացվել երկու հանրաքվե՝ մեկը նոր Սահմանադրության ընդունման հարցի վերաբերյալ, մյուսը՝ նախագահական կառավարման անցման մասին, հայտարարել է Թուրքիայի նախագահ Ռեջեփ Թայիփ Էրդողանը Habertürk-ին տված հարցազրույցում:
Էրդողանն այսօրվա դրությամբ նոր Սահմանադրության ընդունումն ու կառավարման նախագահական մոդելին անցումը առավել կարևոր է համարում Թուրքիայի համար:
Ավելի վաղ Թուրքիայի վարչապետ Ահմեդ Դավութօղլուն հայտարարել էր, որ Թուրքիայում խորհրդարանական կառավարման կարգը չի համապատասխանում պետության շահերին:
2011թ. հոկտեմբերին Թուրքիայի նախկին վարչապետ, ներկայիս նախագահ Էրդողանը նամակ էր գրել ընդդիմադիր «Ժողովրդահանրապետական» ու «Ազգային շարժում» կուսակցություններին՝ կոչ անելով մասնակցել նոր Սահմանադրության ընդունման վերաբերյալ բանակցություններին:
Էրդողանն ավելի վաղ նշել էր, որ երկրի խորհրդարանական ընտրություններում «Արդարություն և զարգացում» կուսակցության հաղթանակի դեպքում Թուրքիայում հարց կբարձրացվի նոր Սահմանադրության ընդունման մասին:
Թուրքիայի ընդդիմությունը դեմ է նոր Սահմանադրության ընդունմանը:
