«Իմացե՛ք, թե ինչն է լինելու նորաձև, և մոռացե՛ք այն ամենը, ինչ ասացի». Անկեղծանում է դիզայներ Ֆաինան

168.am-ն անդրադարձել էր օրերս կայացած «The LOFT» ժամանցի և ինքնազարգացման կենտրոնի մեկամյակի առթիվ տեղի ունեցած բարեգործական սեմինարներին: ««Լոֆթի» համար հատկանշական այս օրը վերածվելու է բարեգործական տոնի. այն 1.000.000 դրամը (+տվյալ օրվա ողջ հասույթը), որը նախատեսված էր ծննդյան եռուզեռի համար, տրամադրվելու է առողջական խնդիրներ ունեցող փոքրիկներին»,- ասվում էր «Լոֆթի» մամլո հաղորդագրության մեջ։ Սեմինարների ողջ հասույթը տրամադրվելու է երկու փոքրիկ աղջնակների` Միլենայի և Նատալիի բուժմանը: Դիզայներ Ֆաինա Հարությունյանը ևս մասնակցեց այդ բարեգործական միջոցառմանը՝ յուրահատուկ վարպետության դաս անցկացնելով մասնակիցների համար:

Նա խոսեց տարեվերջի ամենաքննարկվող թեմաների մասին` ի՞նչ հագնել Ամանորի գիշերը, և որո՞նք են լինելու 2016 թվականի հիմնական տրենդները: Մինչ այդ չզլացավ նշել, որ արդեն, մեղմ ասած, հոգնել է լրագրողների «Ամանորյա» կրկնվող հարցից՝ ի՞նչ հագնել Ամանորի գիշերը:

«Եվ քանի որ ներկաների մեջ կան նաև լրագրողներ, սկսեմ հենց այդ հարցից: Որքան շատ փայլ՝ այնքան ավելի լավ: Ամանորն այն տոնն է, երբ բոլորը կարող են հագնել այն, ինչ ուզում են, իհարկե, հաշվի առնելով այն վայրը, որտեղ պատրաստվում են դիմավորել Ամանորը: Օրինակ, եթե Ամանորին մտադիր եք այցելել փեսացուի մայրիկին, խորհուրդ չեմ տա հագնել այս տարվա «բոմբը»՝ զգեստ-կոմբինացիան: Հիշո՞ւմ եք Ձեր մայրիկների կամ տատիկների «չեխոսլովակյան կոմբինացիաները»: Հենց դա էլ նորաձև է լինելու: Մի տարբերությամբ միայն՝ եթե մեր մայրիկներն ու տատիկները կրում էին այդ կոմբինացիաները հագուստի տակից, մենք անելու ենք լրիվ հակառակը: Այն խորհուրդ է տրվում կրել հաստ բլուզների կամ «վադալազկաների» վրայից, ցանկալի է՝ կոպիտ կոշիկներով»,- ասում է Ֆաինան` խորհուրդ տալով, ամեն դեպքում, հագնել հարմար կոշիկներ:

Եթե Ձեր մտքով էլ անցավ այն, ինչ իմ մտքով, ուրեմն առնվազն երկու սուբյեկտիվ կարծիք համընկավ: Այո, մեղմ ասած, անճաշակություն: Սակայն որտե՞ղ, եթե ոչ՝ նորաձևության ոլորտի մասին գրելիս, տեղին է հիշել «Ճաշակին ընկեր չկա» արտահայտությունը: Ինչևէ, Ֆաինան շարունակեց՝ նշելով. «Նոր Տարուն արդիական են նաև թավշյա զգեստները: Այս տարի հատկապես նորաձև են նաև թավշյա տաբատներն ու պիջակները»:

Ֆաինան խորհուրդ տվեց նաև, նախքան թավշյա տաբատ ընտրելը, չմոռանալ մեր հայկական «թմբլիկ» ոտքերի առանձնահատկությունների մասին: Դիզայները խորհուրդ չի տալիս ձմռանը չարաշահել սպիտակ գույնը` նշելով, որ այդ գույնը ծանր է դիտվում տարվա այս եղանակին:

«Գրեթե ամեն տարի նորաձև է լինում նաև մորթին: Այս տարի, սակայն, նորաձև է գունավոր մորթին: Ինչպես նաև՝ լայն ու «տձև» վերարկուները: Բայց խորհուրդ չեմ տա 16 տարեկան աղջիկներին հագնել մորթուց վերարկուներ և բարձր կրունկների վրա վազել ուսման: Եթե, ամեն դեպքում, ցանկանում եք կրել մորթի, ապա դա արեք՝ կեդերի հետ համադրելով»,- ասում է Ֆաինան:

Շատ է խոսվել այն մասին, որ Ամանորի գույնը կարմիրն է: Դիզայներն առաջարկում է նաև այլ երանգներ, որոնք ակտուալ կլինեն գալիք տարում: «Երբ ասում ենք՝ կարմիր, դեռ չի նշանակում, որ Դուք պետք է ամբողջությամբ «կարմրեք» և նստեք տոնական սեղանի շուրջ: Կարմիր կարող են լինել Ձեր կոշիկները, աքսեսուարները, թեկուզ և՝ ներքնազգեստը միայն»,- նշում է Ֆաինան:

Մեր կեսկատակ դիտարկմանը, որ ներքնազգեստ կրելու դեպքում ստիպված կլինենք ցուցատախտակ կախել մեզ վրա, որ կարմիր ենք կրում, Ֆաինան պատասխանեց. «Կարևորն այն է, որ Դուք իմանաք, որ կարմիր եք կրում: Ախր ես դիզայներ եմ, ո՛չ աստղագուշակ, որ իմանամ, թե տարվա որ նշանն ինչ գույն է սիրում և ինչու է սիրում: Չնայած՝ արդեն այնքան եմ փորփրել այդ կայքերը, որ կիսով չափ նաև աստղագուշակ եմ դարձել: Մի բան կարող եմ հստակ ասել. ինչ էլ որ կրեք՝ կարևորն այն է, որ Ձեզ երջանիկ զգաք այդ զգեստում: Գիտե՞ք, դիզայներ լինելը շատ հարմար է այն առումով, որ ինչ էլ կրես և ասես, թե նորաձև է՝ քեզ կհավատան: Սա միանշանակ կատակ էր»: Թերևս այս կատակը շատ կարևոր ուղերձ ուներ բոլոր նրանց, ովքեր կուրորեն, առանց երկար-բարակ մտածելու՝ հետևում են նորաձևության տրենդներին:

«Պաստելային գույները` վարդագույնը, կապույտը և բաց դեղինը, նորաձև են գարնանը: Իսկ այս սեզոնին, օրինակ, շատ գեղեցիկ են դիտվում կապույտ և վարդագույն վերարկուները»,- ասաց Ֆաինան:

Հետաքրքիր է` ինչպե՞ս են յուրաքանչյուր տարի որոշվում սեզոնային տրենդները: Այս հարցի պատասխանն էլ պարզեցինք Ֆաինայի օգնությամբ: «Կան հատուկ կազմակերպություններ, որոնք ստեղծում են «trend book»-եր և այնտեղ ներկայացնում են, թե ինչ կտորներ և գույներ են արդիական լինելու տվյալ տարում: Դիզայներներն էլ, բավականին լուրջ գումարով գնում են այդ գրքերը և ըստ այդմ` ստեղծում իրենց հավաքածուները»:

Ամփոփելով նորաձևությանը վերաբերող հարցերը, դիզայներ Ֆաինան, այնուամենայնիվ, խորհուրդ տվեց մոռանալ այն ամենը, ինչ քիչ առաջ ինքն ասաց. «Իմացանք, թե ինչն է լինելու նորաձև, իսկ հիմա խնդրում եմ՝ մոռացե՛ք այս ամենը: Եվ հիշեք, որ նորաձևությունը բիզնես է: Բիզնես, որի ժամանակ մենք վաճառում ենք, իսկ Դուք՝ գնում: Դրա համար են հորինվում տրենդերն ու սեզոնային գույները»:

Մեր դիտարկմանը, որ նորաձևությունը մեծ իմաստով՝ գեղեցիկ, բայց այնուամենայնիվ՝ լավ մշակված խաբկանք է, Ֆաինան պատասխանեց. «Այդքան կտրուկ չէի լինի գնահատականներիս մեջ: Պարզապես անկեղծության համար ես ասում եմ, որ, այո, սա բիզնես է: Բիզնես, որի ժամանակ մենք ստեղծում ենք, դուք հաճույք եք ստանում՝ նորույթներ գնելով: Ի դեպ, ես ևս իմանալով, որ այս տարվա գույնը կարմիրն է՝ իմ բրենդի խանութի ցուցափեղկում առաջնահերթ ցուցադրել եմ կարմիր գույնի զգեստներ»: Ֆաինան ողջունում է սեփական ոճի զգացումը, որը, թերևս, չպետք է անցնի անճաշակության սահմանը: «Նորաձևության մեջ ամենակարևորը պետք է իմանալ, թե որտեղ և ինչ ես հագնում: Կարևոր է, որ ցանկացած անհատ ունենա իր ոճը: Եթե տվյալ մարդուն դուր չի գալիս վարդագույնը, նա չպետք է զուտ նորաձևությունից ելնելով՝ հագնի, օրինակ, այդ գույնի վերարկու»,- նշում է Ֆաինան:

Լուսանկարները՝ «Լոֆթի» և Ֆաինա Հարությունյանի ֆեյսբուքյան էջից