Անկարան չի ձգտում ուռճացնել «Սու-24»-ի դեպքը. Էրդողան
Թուրքիայի նախագահ Ռեջեփ Թայիփ Էրդողանը հայտարարել է, որ Անկարան չի ձգտում ուռճացնել ռուսական ռմբակոծիչ ինքնաթիռի հետ կապված դեպքը:
Նա նշել է, որ իր երկիրը կողմնակից է իրավիճակի քաղաքական կարգավորմանը, սակայն դրա հետ միասին, Թուրքիան մտադիր չէ անտեսել սահմանների խախտումը, հայտնում է RIA Novosti-ն:
«Թուրքիան միշտ հանդես է եկել խաղաղության, երկխոսության, դիվանագիտական կարգավորման օգտին, ու սրանից հետո ևս մենք կշարունակենք անել նույնը: Սակայն ոք ոք թող չակնկալի, որ մենք կմնանք խուլ ու համր՝ մեր տիրույթի, մեր սահմանների, մեր ինքնիշխանության խախտման նկատմամբ:
Մենք միտք չունենք ուռճացնել ինքնաթիռի հետ կատարվածը, մենք միայն պաշտպանում ենք մեր անվտանգությունն ու մեր թուրքմեն եղբայրների իրավունքները»,- ասել է Էրդողանը:
