Դեղերի գները նվազել են
Հանրապետությունում վերջին շրջանում արձանագրվել է դեղերի գների նվազում: Այս մասին ՀՀ կառավարության նիստի սկզբում հայտարարեց ՀՀ առողջապահության նախարար Արմեն Մուրադյանը:
ՀՀ առողջապահության նախարարության կողմից մշտադիտարկվել են թվով 4 դեղագործական կազմակերպությունների մայիս–հոկտեմբեր ամիսների ընթացքում իրացված 50 անվանում առավել լայն սպառում ունեցող (հիմք` ներմուծման ծավալները) դեղերի (ցավազրկողներ, ոչ հորմոնային հակաբիոտիկներ, լայն սպեկտրի հակաբիոտիկներ, սրտային, հորմոնային, անոթային, հակադիաբետիկ, վիտամիններ և հակասնկային) մանրածախ գները:
Ըստ մշտադիտարկման արդյունքների` հիշատակված դեղերի մանրածախ գների պատկերը մայիս-հոկտեմբեր ամիսների համեմատությամբ հետևյալն է.
1) 30 անվանում (60 տոկոս) դեղերի գները մնացել են անփոփոխ
2) 17 անվանում (34 տոկոս) դեղերի գները նվազել են մինչև 30 տոկոս,
3) 3 անվանում (6 տոկոս) դեղերի գները բարձրացել են մինչև 3 տոկոս:
Նախարարն ընդգծեց, որ յուրաքանչյուր ամսվա ընթացքում հանրությանը կներկայացվեն շարունակական ուսումնասիրությունների արդյունքները:
ՀՀ կառավարության նիստից հետո լրագրողների հետ զրույցում Արմեն Մուրադյանը նշեց, որ ԵԱՏՄ ընդհանուր տնտեսական տարածքում գնային քաղաքականությունը ներդաշնակ պահելու նպատակով տարեսկզբից իրականացվել են նույնականացման աշխատանքներ:
Դեղերի գների իջեցումը տեղի է ունեցել հայաստանյան դեղներմուծող և արտադրող ընկերությունների և դեղագործական ներկայացուցչությունների հետ պարբերաբար հանդիպումների հետ ձեռք բերված պայմանավորվածությունների արդյունքում:
