Քուրդ աշխարհազորայինները մտել են Իրաքի Սինջար քաղաք
Քրդական զինված խմբավորումները մտել են Իրաքի հյուսիսում գտնվող Սինջար քաղաք, Twitter-ում հայտնել է Քրդստանի անվտանգության շրջանային խորհուրդը:
«Փեշմեգայի» ուժերը ներկայում տարբեր ուղղություններից մտնում են Սինջար, որպեսզի շրջանը ազատեն ԴԱԻՇ-ի ահաբեկիչներից»,- ասվում է հաղորդագրության մեջ:
Ինչպես հայտնում է Reuters-ը, հղում կատարելով ականատեսներին, քաղաքում լսվում են ծանր հրետանու ձայներ, իսկ քաղաքի գլխավոր փողոցում տեսանելի են մի քանի հարյուր քուրդ զինյալներ:
Եվս մի ականատես պատմել է Associated Press-ին, որ երեկ երեկոյան քաղաքից փախել է ավելի քան 50 իսլամիստ:
Հիշեցնենք, որ Սինջարի վրա հարձակումն սկսվել է նախօրեին: Օպերացիային մասնակցում է շուրջ 7,5 հազար մարտիկ, որոնց աջակցում է ԱՄՆ-ի գլխավորած ռազմական կոալիցիայի ավիացիան:
Սինջարը ԴԱԻՇ-ի ջիհադիստների վերահսկողության ներքո է գտնվում 2014 թվականից օգոստոսից, ինչից հետո քաղաքից հեռացել էին տասնյակ հազարավոր եզդիներ: Շատերը, ովքեր չէին հասցրել հեռանալ քաղաքից, սպանվել էին:
