Հայհոյել է և՛ հարևաններին, և՛ ոստիկանին, դանակով սպառնացել. գործը ՀՔԾ վարույթում է
2015 թվականի հոկտեմբերի 20-ին՝ ժամը 13:30-ի սահմաններում, Գյումրի քաղաքի բնակիչ Էդգար Ա.-ն վիճաբանել է հարևանուհու հետ, կոպիտ կերպով խախտելով հասարակական կարգը, տևական ժամանակ հայհոյանքներ է հնչեցրել ինչպես հարևանների, այնպես էլ՝ իր ծառայողական պարտականությունները կատարող ոստիկանության աշխատակից Արտավազդ Մ.-ի հասցեին:
Բացի այդ, Էդգար Ա.-ն դիմադրություն է ցույց տվել հասարակական կարգի խախտումը խափանող Կարեն Պ.-ին: Վերջինիս նկատմամբ Էդգար Ա.-ն բռնություն է գործադրել՝ պատճառելով մարմնական վնասվածքներ:
Էդգար Ա.-ն խուլիգանական գործողությունների ընթացքում իր մոտ եղած սառը զենք հանդիսացող դանակն օգտագործելով՝ հարձակվել է Կարեն Պ.-ի վրա և սպառնացել սպանել վերջինիս:
Քաղաքացի Էդգար Ա.-ի կողմից սառը զենքի գործադրմամբ խուլիգանություն կատարելու դեպքի առթիվ Շիրակի մարզային քննչական վարչությունում ՀՀ քրեական օրենսգրքի 258-րդ հոդվածի 4-րդ մասի հատկանիշներով հարուցվել է քրեական գործ և կատարվել նախաքննություն:
Հետագայում գործի փաստական հանգամանքներով պայմանավորված՝ լրիվ, օբյեկտիվ և բազմակողմանի քննությունը երաշխավորելու անհրաժեշտությունից ելնելով՝ քրեական գործը քննության է ուղարկվել ՀՀ հատուկ քննչական ծառայություն:
Նախաքննությունը շարունակվում է:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
