Ռուսաստանն առաջարկել է 1,5 տարի հետո Սիրիայում անցկացնել նախագահական ընտրություններ
Փաստաթղթի համաձայն, որը տարածվել է ՄԱԿ-ում Վիեննայում շաբաթ օրը Սիրիայի հարցով կայանալիք բանակցությունների նախօրեին, Ռուսաստանն առաջարկում է սահմանել 18-ամսյա անցումային շրջան քաղաքացիական պատերազմով բռնկված երկրում, ինչից հետո հնարավոր կլինի անցկացնել նախագահական ընտրություններ: Այս մասին հայտնում է BBC-ի ռուսական ծառայությունը:
Առաջարկություններից չի բխում՝ արդյոք Մոսկվան ցանկանում է Բաշար Ասադին տեսնել նախագահի պաշտոնում այդ ժամանակահատվածում: Փաստաթղթում նշված չէ նաև այն մասին, թե արդյոք պետք է վերջինս իր թեկնածությունն առաջադրի արտահերթ նախագահական ընտրություններում:
Կրեմլը սիրիական ընդդիմությանն առաջարկում է հանդես գալ մեկ միասնական ճակատով՝ որպես բանակցային գործընթացի կողմերից մեկը:
Ինչպես ավելի վաղ հայտարարել էր ՌԴ ԱԳՆ ներկայացուցիչ Մարիա Զախարովան, շաբաթօրյա հանդիպման գլխավոր նպատակներից է որոշել, թե սիրիական ընդդիմության որ ներկայացուցիչներին է հարկավոր համարել բանակցային գործընթացի գործընկեր:
