Հայտնի է, թե երբ կհանդիպեն Պուտինն ու Օբաման Նյու Յորքում
Ռուսաստանի նախագահ Վլադիմիր Պուտինի մամլո քարտուղար Դմիտրի Պեսկովը հայտարարել է, որ Վլադիմիր Պուտինի ու ԱՄՆ նախագահ Բարաք Օբամայի հանդիպումը տեղի կունենա սեպտեմբերի 28-ին Նյու Յորքում՝ ՄԱԿ-ի գլխավոր ասամբլեայի շրջանակում: Այս մասին հայտնում է RIA Novosti-ն:
Պեսկովը նաև հայտարարել է, որ Ռուսաստանի նախագահ Վլադիմիր Պուտինի ու Բարաք Օբամայի հանդիպումը տեղի է ունենալու փոխադարձ պայմանավորվածությամբ:
«Հանդիպումը տեղի կունենա փոխադարձ պայմանավորվածությամբ»,- ասել է նա՝ ի պատասխան այն հարցին, թե ով է եղել հանդիպման նախաձեռնողը:
Պեսկովը նշել է, որ հանդիպման առանցքային թեման լինելու է Սիրիան: Պուտինի մամլո քարտուղարն ընդգծել է, որ Ուկրաինայում ստեղծված իրավիճակը երկու երկրների նախագահները կքննարկեն, եթե ժամանակ լինի:
«Ուկրաինայի հարցով հիմնական քննարկումները, այնուամենայնիվ, տեղի կունենան հոկտեմբերի 2-ին Փարիզում «նորմանդյան քառյակի» ձևաչափով»,- հավելել է նա:
Պեսկովը հայտնել է, որ Ռուսաստանի ու ԱՄՆ-ի նախագահների հանդիպումը տեղի կունենա ՄԱԿ-ի Գլխավոր ասամբլեայում նրանց ելույթներից հետո ու կտևի մոտ 1 ժամ:
