ԱՄՆ Պետդեպը Հայաստանին ու Ադրբեջանին կոչ է արել անհապաղ դադարեցնել բռնություններն ու լիցքաթափել իրավիճակը
ԱՄՆ Պետդեպարտամենտը երեկ հայտարարել է, որ ըստ իր հավաստի տեղեկությունների, Հայաստանն ու Ադրբեջանը միմյանց դեմ կիրառում են ծանր սպառազինություն, ու կոչ է արել դադարեցնել բռնությունը:
«Մենք ստացել ենք արժանահավատ տեղեկություններ առ այն, որ հայկական ու ադրբեջանական ուժերն օգտագործում են ականանետեր ու այլ ծանր զինատեսակներ միջազգային սահմանի երկայնքով, ինչը հանգեցրել է քաղաքացիական զոհերի ու վնաս պատճառել գյուղերին: Մենք խորապես անհանգստացած ենք էսկալացիայով ու դատապարտում ենք ցանկացած ռազմական գործողություն, որն ուղղված է քաղաքացիական անձանց դեմ»,- հայտարարել է ԱՄՆ Պետդեպարտամենտի ներկայացուցիչ Ջոն Կիրբին:
Նա կոչ է արել կողմերին խուսափել քաղաքացիական անձանց շրջանում զոհերից, հայտնում է RIA Novosti-ն:
«Մենք կոչ ենք անում անհապաղ դադարեցնել նման բռնությունը, կոչ ենք անում լիցքաթափել իրավիճակն ու ամենակտրուկ կերպով կոչ ենք անում խուսափել քաղաքացիական անձանց շրջանում զոհերից»,- հավելել է Կիրբին:
Նա Հայաստանին ու Ադրբեջանին հիշեցրել է, որ երկու երկրներն էլ պարտավորվել են որոնել Լեռնային Ղարաբաղի կոնֆլիկտի լուծման խաղաղ ուղիներ ԵԱՀԿ Մինսկի խմբի շրջանակում:
