Սիրիայում իսլամիստներն առանցքային ավիաբազա են գրավել
«Ալ-Քաիդայի» հետ առնչություն ունեցող սիրիացի ապստամբները երկար մարտերից հետո գրավել են Սիրիայի հյուսիս-արևմուտքում գտնվող Իդլիբ նահանգի խոշորագույն ավիաբազան, հայտնում է BBC-ի ռուսական ծառայությունը:
Զինյալները գրեթե երկու տարի փորձում էին տիրանալ «Աբու ալ-Դուխուր» ավիաբազային: Ներկայում զինյալների տիրապետության տակ է գտնվում նահանգի մեծ մասը:
Ապստամբները, որոնք կանգնած են հարձակման հետևում, իսլամիստների կոալիցիայից են: Այդ կոալիցիան իրեն հորջորջում է «Հաղթանակի բանակ»: Այն զինված խմբավորումների միություն է, որի մեջ մտնում են «Ալ-Քաիդայի» սիրիական թևն ու «Նուսրա ճակատը»:
Մարտի վերջից սկսած՝ ապստամբները գրավել են նահանգի մի քանի քաղաք, ներառյալ Իդլիբն ու Ջիսր-ալ-Շուղուրը:
Սիրիացի զինվորականները ավիաբազան կորցնելուց հետո ամբողջությամբ հեռացել են Իդլիբ նահանգից:
