Փոթորկի պատճառով նավերը չեն կարողանում մտնել Փոթի
Երեկվանից նավերը ուժեղ փոթորկի պատճառով չեն կարողանում մտնել Վրաստանի Փոթի նավահանգիստ, «Նովոստի-Գրուզիային» հայտնել է նավահանգստի ադմինիստրացիայի ղեկավար Մարիամ Նադարյան:
Եղանակային վատ պայմանները Փոթիում սկսվել են մի քանի օր առաջ: Երեքշաբթի գիշեր տեղացած հորդառատ անձրևի պատճառով ջրածածկ էին եղել Փոթիի կենտրոնական փողոցներն ու տների առաջին հարկերը:
«Ներկայում փոթորկի պատճառով նավերը չեն կարողանում մտնել ու դուրս գալ նավահանգստից: Երեկ եղել է 4-բալանոց փոթորիկ: Ցանկանում եմ նշել, որ ոչ մի արտակարգ բան տեղի չի ունենում ու դա սովորական իրավիճակ է նավահանգստի համար»,- ասել է Նադարյան:
Ինչ վերաբերում է Բաթումին, ապա այնտեղ, ի տարբերություն Փոթիի, իրավիճակը հանգիստ է: Չնայած փոթորկոտ ծովին՝ նավերը կարողանում են մոտենալ նավահանգստին:
