«Կադրերի բաժին N 168»-ում Աղվան Պապոյանն է. «Ըստ Բարնիի վարկածի»
«Կադրերի բաժին N 168»-ում այսօր ընթերցողներին իր սիրելի ֆիլմն է առաջարկում «Մալխաս» ջազ ակումբի և Հայաստանի պետական ջազային նվագախմբի նախկին մեներգիչ, մոսկվաբնակ երաժիշտ Աղվան Պապոյանը:
Աղվանն առաջարկում է ուրբաթ երեկոն անցկացնել ըստ Բարնիի վարկածի՝ կանադացի ռեժիսոր Ռիչարդ Ջ. Լյուիսի համանուն ֆիլմի ուղեկցությամբ (Richard J. Lewis «Barney’s Version»):
Իր առաջարկած ֆիլմի մասին Աղվանը նշում է. «Իմ կարծիքով՝ կինոյի պատմության ընթացքում ստեղծված լավագույն ֆիլմերը հին՝ հոլիվուդյան, սովետական կամ եվրոպական ֆիլմերն են, ու կարող էի սիրով թվարկածս շարքից մեկն ու մեկն ընտրել, բայց այսօր «Կադրերի բաժին N 168»-ին ուզում եմ առաջարկել նոր նկարահանված, ռեժիսոր Ռիչարդ Ջ. Լյուիսի «Ըստ Բարնիի վարկածի» տրագիկոմեդիան, որը վերջին 5-6 տարիների ընթացքում իմ դիտած ամենատպավորիչ ֆիլմն էր: Կարծում եմ՝ կինոմաններին իմ առաջարկած ֆիլմը չի զարմացնի, հատկապես, որ ես էլ ինձ համարում եմ այդպիսին: Ֆիլմում արտառոց ոչինչ չկա, պարզապես հերոսն ինձ շատ հոգեհարազատ է»:
«Ըստ Բարնիի վարկածի» տրագիկոմեդիան նկարահանվել է 2010 թ. Կանադայում: Գլխավոր դերերում հանդես են գալիս դերասաններ Պոլ Ջիամաթին, Դասթին Հոֆմանը:
Ֆիլմը սկսվում է գլխավոր հերոս Բարնի Պանովսկու՝ ոմն Բլերի հետ հեռախոսազանգից, ում Բարնին խնդրում է խոսափողի մոտ հրավիրել կնոջը: Բլերը հրաժարվում է, ինչից հետո Բարնին կախում է հեռախոսափողը:
Հաջորդ առավոտյան նա լսում Բլերի՝ սրտի կաթված ստանալու լուրը: Բարնին մեկնում է աշխատանքի՝ «Մելլին հյուսիսից» ֆիլմի նկարահանման հրապարակ, որի պրոդյուսերն է արդեն տարիներ շարունակ: Ծանր աշխատանքային օրվա ավարտը Բարնին որոշում է անցկացնել ակումբում, որտեղ հանդիպում է դեդեկտիվ Հիրնային, ով պահանջում է նրանից խոստովանել գործած հանցանքը՝ Բլերի սպանությունը…
Ֆիլմը կարող եք դիտել այստեղ՝
168.am-ը մաղթում է հաճելի կինոդիտում։
Խորագիրը վարում է Նվարդ Մանվելյանը
