Յուրա Մովսիսյանը կատարել է 8-ամյա աղջնակի երազանքը
Մոսկվա «Սպարտակի» պաշտոնական կայքը ներկայացրել է մի շատ հուզիչ պատմություն, որի գլխավոր դերում հայ ֆուտբոլիստ Յուրա Մովսիսյանն է:
Ակումբի ՝ Սամարա մեկնելուց առաջ թիմի էլեկտրոնային փոստին նամակ եկավ Ուլյանովսկում բնակվող մի ընտանիքից: Ալեքսեյն ու Ելենան, ովքեր «Սպարտակի» վաղեմի երկրպագուներն են, խնդրել էին իրականություն դարձնել իրենց 8-ամյա դստեր խնդրանքը և կազմակերպել հանդիպում աղջնակի սիրելի ֆուտբոլիստի ՝ Յուրա Մովսիսյանի հետ: Այս մասին իմանալով` Մովսիսյանը միանգամից դրական պատասխան է տվել, իսկ մոսկովյան ակումբի ղեկավարությունն էլ թույլ է տվել, որ աղջիկը ներկա գտնվի թիմի շաբաթօրյա մարզմանը:
Անգելինան մանկական ուղեղային կաթված (ДЦП) ունի: Սակայն դա չի խանգարում աղջկան երկրպագել իր սիրելի ակումբին: Ինչպես Անգելինայի հայրն է պատմում, նա արդեն հասցրել է թիմի 2 արտագնա հանդիպման մասնակցել: Օրինակ «Ռուբինի» դեմ խաղի ժամանակ նա, բոլորովին չվախենալով «Ռուբինի» երկրպագուներից, բարձրաձայն բղավում էր «Самый лучший из армян — это Юра Мовсисян»:
Աղջկա երազանքը կատարվեց, քանի որ բացի Մովսիսյանից նա հանդիպեց թիմի ֆուտբոլիստների և մարզչական շտաբի անդամներին: Վերջիններս անգամ հերթ էին կանգնել, որպեսզի նկարվեն աղջնակի հետ:
Անգելինան ամաչեց և կարմրեց, երբ տեսավ Մովսիսյանին, սակայն միանգամից հավաքեց իրեն և հագավ իր կուռքի նվիրած շապիկն ու գլխարկը:
Աղջիկը ամուր փաթաթվեց Մովսիսյանին և հաջողություն մաղթեց առաջիկա հանդիպումներում: 
Սիրարփի Աղաբաբյան
