ԵՄ-ն առաջարկում է խստացնել օդաչուների ստուգման պահանջները
Ավիացիոն անվտանգության եվրոպական գործակալությունը (EASA) կոչ է արել խստացնել քաղավիացիայի օդաչուների ստուգման կանոնները, որպեսզի բացառվի Germanwings ընկերության ինքնաթիռի ողբերգության կրկնությունը, հայտնում է BBC-ի ռուսական ծառայությունը:
Մասնավորապես, EASA-ն առաջարկում է ներդնել օդաչուների հոգեկան վիճակն ստուգող հավելյալ հոգեբանական ստուգումներ ու ալկոհոլի ու թմրանյութերի թեսթեր: Ստուգումների արդյունքները պետք է հայտնվեն ԵՄ ընդհանուր բազայում:
Բացի այդ՝ առաջարկվում է որքան հնարավոր է աջակցել «երկու մարդ օդաչուի խցիկում» կանոնին, որը ԵՄ որոշ երկրներ ներմուծել էին անմիջապես ողբերգությունից հետո:
Հիշեցնենք, որ Airbus A320 ինքնաթիռը մարտին աղետի էր ենթարկվել ֆրանսիական Ալպերում: Բարսելոնից Դյուսելդորֆ ուղևորվող ինքնաթիռում գտնվել է 150 մարդ: Նրանք բոլորն էլ զոհվել էին:
Երկրորդ օդաչու Անդրեաս Լյուբիցի գործողությունները դատախազությունը որակել էր որպես չկանխատեսված սպանություն:
