Մենք հիանալի կերպով կարող ենք ապրել առանց Եվրոպայի խորհրդի ու ապրել ենք. Իլհամ Ալիև
Կարծում եմ, որ եթե մենք այսօր ստիպված լինեինք ընտրություն կատարել՝ հաշվի առնելով ստեղծված իրավիճակը, ապա, հնարավոր է՝ չէինք դառնա Եվրոպայի խորհրդի անդամ:
Ինչպես հայտնում է APA-ն, այս մասին հայտարարել է Ադրբեջանի նախագահ Իլհամ Ալիևը երկրի նախարարների կաբինետի նիստում, որը նվիրված է եղել 2015 թվականի առաջին կեսի տնտեսական զարգացմանը:
«Երբեմն ես լսում եմ պետական պաշտոնյաներից, պատգամավորներից, հասարակական գործիչներից, որ պետք է ինտեգրվենք Եվրոպային: Մտածեք, երբ խոսում եք այդ մասին: Առաջին հերթին՝ դուք պետք է իմանաք նախագահի դիրքորոշումը, երկրորդ՝ ինչ ձևաչափով եք ինտեգրվելու: Հարկավո՞ր է այդ ինտեգրացիան ձեզ, թե՞ ոչ, ի՞նչ որակով են Ադրբեջանին ցանկանում այդտեղ ընդունել՝ ինչպես երկրորդակա՞ն անդամ, ասոցիատի՞վ անդամ: Նման ձևաչափ մեզ հարկավոր չէ:
Այնտեղ, որտեղ հարկն է, մենք ինտեգրվել ենք: Արել ենք դա այն ժամանակ, երբ Եվրոպայում վիճակն այլ էր: Կարծում եմ, որ եթե մենք այսօր ստիպված լինեինք ընտրություն կատարել՝ հաշվի առնել այդ իրավիճակը, ապա, հնարավոր է՝ մենք չէին դառնա Եվրոպայի խորհրդի անդամ: Որքա՞ն կարելի է վիրավորել Ադրբեջանին: Որքա՞ն հնարավոր է մեզ նվաստացնելու փորձեր ձեռնարկել: Մեր համբերության բաժակը լցվել է:
Մենք հիանալի կերպով կարող ենք ապրել առանց Եվրոպայի խորհրդի ու ապրել ենք: Ապրել ենք մինչև 2001 թվականը: Այդ ժամանակ Ադրբեջանում քաղաքացիական պատերազմ էր, հայկական օկուպացիա, քաղաքական ճգնաժամ, տնտեսական անկում: Ապրել ենք, չենք մահացել»,-հայտարարել է Ալիևը:
Ալիևի խոսքով՝ Ադրբեջանը Եվրոպայի խորհուրդ է մտել Ղարաբաղյան խնդրի կարգավորման համար:
«Հարցն այսպես էր դրված: Գիտեինք, որ Հայաստանը ձգտում է դառնալ Եվրոպայի խորհրդի անդամ: Մենք նույնպես ցանկանում էինք այնտեղ լինել, որ տվյալ հարցը արդարացի լուծվեր: Բայց ի՞նչ ենք մենք տեսնում՝ անարդարություն, երկակի ստանդարտներ, իսլամաֆոբիա, նախանձ»,- հայտարարել է Ալիևը՝ նշելով, որ հենց Եվրոպական խաղերի ժամանակ վերջիններս բանաձևում հոգուտ հայերի փոփոխություն են կատարել:
«Ի՞նչ է դա նշանակում: Դա ակնհայտ հակաադրբեջանական դիրքորոշում է: Այդ պատճառով էլ նորից եմ վերադառնում այդ թեմային: Մենք ոչ մի տեղ չենք ինտեգրվում: Որտեղ ինտեգրվել ենք, բավական է»,-հայտարարել է Ալիևը:
