Գալուստ Սահակյան. Սահմանադրությունն իրավական հենքի վրա է դրել մեր զգացմունքները
ՀՀ Ազգային ժողովի նախագահ Գալուստ Սահակյանը շնորհավորական ուղերձ է հղել Սահմանադրության օրվա առթիվ:
Ուղերձում ասված է.
«Սիրելի հայրենակիցներ,
շնորհավորում եմ Սահմանադրության օրվա առթիվ:
Սահմանադրությունն իրավական հենքի վրա է դրել մեր զգացմունքներն ու այն արժեհամակարգը, որն ի բնե մեր մեջ է եղել անգամ պետականության բացակայության պայմաններում: Այն մեր պետականության կարևորագույն և հիմնական իրավական վկայագիրն է: Եվ բոլորիս պարտքն է ՀՀ Սահմանադրությամբ հռչակված և նրա հիմքում ընկած արժեքներին վերաբերվել այնպես, ինչպես մեր պատմությանն ու երկրին:
20 տարի առաջ անկախ Հայաստանի Սահմանադրության ընդունումով քվեարկեցինք իրավական պետության, ժողովրդավարության և ազատության օգտին, ըստ էության, վերահաստատելով այն, ինչ հայտարարել էինք դրանից մի քանի տարի առաջ անցկացված անկախության հանրաքվեով: Իսկ սահմանադրության ընդունումից մեկ տասնամյակ անց փոփոխություններ կատարելով երկրի հիմնական օրենքում` ավելի հասունացած քաղաքացիական և քաղաքական գիտակցությամբ վերստին հավաստեցինք հավատարմությունը ժողովրդավարական զարգացմանն ու առաջընթացին:
Սահմանադրությունը մեզ տվել է ամենագլխավորը` ընտրության իրավունք` ճանապարհի, ազատության, մտածողության և կենսակերպի ընտրության իրավունք: Արդեն մի քանի տասնամյակ նշելով Սահմանադրության օրը` մենք մեր հարգանքն ենք արտահայտում ոչ միայն երկրի հիմնական իրավական փաստաթղթի ու պետականության, այլև մեր իսկ ընտրության նկատմամբ:
Սիրելի հայրենակիցներ,
Սահմանադրության մեջ կատարվող կամ նախատեսվող որևէ փոփոխություն նպատակ ունի ավելի ժողովրդավարական դարձնել կառավարման համակարգը, ընդլայնել քաղաքացիական հասարակության մասնակցությունը երկրի ընթացքին, փաստելով, որ ուժեղ պետությունը նաև նշանակում է ոչ միայն տնտեսապես մեծ հնարավորություններ, այլև ուժեղ քաղաքացիական հասարակություն` ազգային և համամարդկային արժեքներով առաջնորդվող և դրանք ի շահ սեփական երկրի ծառայեցնող: Այդպիսի ուղղվածություն ունեն նաև առաջիկայում նախատեսված և երկրի հիմնական օրենքի բովանդակությունը հարստացնելուն միտված սահմանադրական փոփոխությունները, որոնք, բնականաբար, կյանքի են կոչվելու ժողովրդի հավանությանն արժանանալուց հետո:
Սահմանադրությունը ոչ միայն գործողությունների ծրագիր է, այլև նախ և առաջ հնարավորություն այդ գործողությունների համար: Այն ոչ միայն մեր երազանքների ամփոփումն է, այլև նպատակների ամրագրում: Այն հարգանք է հանուն պետականության մարտնչածների և այդ պետականությանը կերտածների հանդեպ, միաժամանակ, վստահություն է պետականությունը հուսալի ձեռքերում պահողների և պետականության ապագայի մասին մտածողների հանդեպ: Այն նոր հաղթանակների երաշխիքն է և մղում է նոր ձեռքբերումների:
Մաղթում եմ Ձեզ խաղաղություն, բարեկեցություն և լավատեսություն»:
