Թուրքիան չի ճանաչում Ղրիմի ապօրինի բռնակցումը. Չավուշօղլու
ZN.UA-ի փոխանցմամբ՝ Թուրքիայի արտգործնախարար Մևլյութ Չավուշօղլուն հաստատել է, որ Թուրքիան չի ճանաչում Ղրիմի ապօրինի բռնակցումը. «Մենք երբեք չենք ճանաչել ու չենք ճանաչում Ղրիմի ապօրինի բռնակցումը»: Չավուշօղլուն այս մասին հայտարարել է Կիևում՝ Ղրիմի թաթարների բռնագաղթեցման 71-ամյակին (1944թ.) նվիրված միջոցառման ժամանակ:
Նրա խոսքերով՝ Թուրքիան հետագայում նույնպես շարունակելու է մոնիտորինգի ենթարկել Ղրիմում տիրող իրավիճակն ու օգնել Ղրիմի թաթարներին. «Այստեղ մեր ներկայությունն այն բանի վառ վկայությունն է, որ թուրք և ուկրաինացի ժողովուրդները մշտապես եղել են Ղրիմի թաթարների հետ»:
Թուրքիայի նախագահ Ռեջեփ Էրդողանը մարտին Կիև կատարած այցի ժամանակ Ղրիմի թաթարներին խոստացել էր միջազգային մակարդակի օգնություն:
