Բաքվի Վերաքննիչ դատարանում անորոշ ժամկետով հետաձգվել է Խադիջա Իսմայլովայի բողոքի քննումը
Ադրբեջանական Turan լրատվական գործակալության փոխանցմամբ՝ անորոշ ժամկետով հետաձգվել է Բաքվի Վերաքննիչ դատարանի կողմից լրագրողուհի Խադիջա Իսմայլովայի ներկայացրած բողոքի դիտարկումը:
Բաքվի Վերաքննիչ դատարանի այսօրվա նիստն ավարտվել է մեկնարկից րոպեներ անց: Դատարանի դահլիճը ծափահարություններով է դիմավորել Խադիջա Իսմայլովային: Դիմելով դատավոր Գաիլ Մամեդովին՝ Իսմայլովան հայտարարել է, որ իրեն թույլ չեն տալիս շփվել փաստաբանի հետ:
Սակայն դատավորը հայտարարել է, որ այդ հարցը չի վերաբերվում իր իրավասությանը: Իսմայլովան իր գործընկեր լրագրողներին կոչ է արել ամուր մնալ՝ ընդգծելով, որ նրանցից ակնկալում է լրագրողական լավ հետաքննություններ. «Ես ամուր եմ, ինձ համար մի՛ մտահոգվեք»:
Խադիջա Իսմայլովան բողոքարկել է 2015 թվականի փետրվարի 23-ին կայացված դատական որոշումը, որով բավարարվել էր Էլման Հասանովի բողոքը: Տվյալ որոշմամբ լրագրողուհին «զրպարտանքի» համար տուգանվել էր 2500 մանաթով: Ավելի ուշ նրա դեմ ներկայացվեցին մի շարք լուրջ մեղադրանքներ և նրան կալանավորեցին:
