ԱՄՆ Պետդեպարտամենտն Ադրբեջանի իշխանություններին կոչ է արել ազատ արձակել Խադիջա Իսմայլովային
Ադրբեջանական Turan լրատվական գործակալության փոխանցմամբ՝ ԱՄՆ-ը լրջորեն մտահոգված է Ադրբեջանում այն անձանց կալանավորվելու կապակցությամբ, որոնք փորձում են իրագործել իրենց հիմնարար ազատությունները:
Այս մասին երեկ Վաշինգտոնում լրագրողների հետ ճեպազրույցում հայտարարել է ԱՄՆ Պետդեպարտամենտի ներկայացուցիչ Ջեֆֆ Ռատկեն: Նրա խոսքերով՝ այդ անձանց թվում հայտնվել է նաև լրագրողուհի Խադիջա Իսմայլովան, և իրենք կոչ են անում ազատ արձակել նրան.
«Մենք համառորեն Ադրբեջանի կառավարությանը կոչ ենք անում հարգանք ցուցաբերել սեփական քաղաքացիների ունիվերսալ իրավունքների հանդեպ և պայմաններ ստեղծել ազատ արտահայտվելու համար»:
