Ամենաինտելեկտուալը Շիրակի մարզն է

Փետրվարի 21-ին Հայաստանի երիտասարդական հիմնադրամում տեղի ունեցավ ՀՀԿ մարզային երիտասարդական կազմակերպությունների ինտելեկտուալ խաղ-մրցույթի հանրապետական փուլը, որին մասնակցում էին մարզային փուլերում հաղթող ճանաչված թիմերը` Արագածոտնի մարզից Ապարանի շրջանային երիտասարդական կազմակերպությունը, Սյունիքից` Կապանի շրջանային երիտասարդական կազմակերպությունը, Կոտայքից` Չարենցավանի, Լոռու մարզից` Վանաձորի, Արմավիրից` Վաղարշապատի, Գեղարքունիքից` Գավառի, Արարատից` Արտաշատի, Տավուշից` Նոյեմբերյանի և Շիրակի մարզից` Գյումրի2 շրջանային երիտասարդական կազմակերպությունը:

Մրցույթի անցկացումն ի սկզբանե նպատակ է ունեցել տարբեր մասնագիտություններ ունեցող երիտասարդ ՀՀԿ-ականներին ներգրավել կրթական գործընթացում, խթանել երիտասարդական ակտիվությունը, նպաստել տարբեր շրջանային կազմակերպությունների շփման ու համագործակցության խորացմանը, ինչպես նաև հարստացնել մասնակիցների գիտելիքները:

Խաղ-մրցույթների ընթացքում ընթացքում տարբեր հարցերի միջոցով երիտասարդները փոխանցում են գիտելիքներ զանազան թեմաների վերաբերյալ:

Մրցույթի մեկնարկին ողջույնի խոսքով հանդես եկավ ՀՀԿ երիտասարդական կազմակերպության նախագահ Կարեն Ավագյանը, ով կարևորեց նման ծրագրերի իրականացումը և դրանց շարունակականության ապահովումը: Նրա խոսքով այս միջոցառումը բացառիկ է այն առումով, որ մինչ այժմ ոչ մի այլ կուսակցության երիտասարդական կազմակերպություն հանդես չի եկել նման նախաձեռնությամբ, և նաև այն առումով, որ մրցույթին մասնակցում է ոչ թե երևանաբնակ կամ ուսանողական շրջանակներում գործունեություն ծավալող, այլ բացառապես մարզային երիտասարդությունը: ՀՀԿ ԵԿ նախագահը, բարի ընթացք մաղթելով խաղին, երիտասարդներին խորհուրդ տվեց շարունակաբար նման ծրագրեր իրականացնել մարզերում` երիտասարդ ՀՀԿ-աններին սեփական գիտելիքները միմյանց փոխանցելու և այս ոլորտում ևս մրցունակ լինելու հնարավորություն ընձեռելու համար:

Ողջույնի խոսքից հետո մասնակիցները ծանոթացան ժյուրիի կազմին և խաղ-մրցույթի կանոններին: Այնուհետև առողջ մրցակցության և համառ պայքարի արդյունքում հաղթող ճանաչվեց Շիրակի մարզից Գյումրի2 շրջանային ԵԿ -ն, 2-րդ և 3-րդ հորիզոնականները համապատասխանաբար զբաղեցրին Արմավիրից Վաղարշապատի և   Արագածոտնից Ապարանի շրջանային երիտասարդական կազմակերպությունները:

Մրցույթի ավարտից հետո հաղթող թիմերը պարգևատրվեցին պատվոգրերով ու արժեքավոր տեխնիկական նվերներով և կիսվեցին դրական տպավորություններով:

ՀՀԿ երիտասարդական կազմակերպություն