Սերժ Սարգսյանը հրամանագիր է ստորագրել

Հայաստանի նախագահ Սերժ Սարգսյանը հրամանագիր է ստորագրել միջազգային տնտեսական համագործակցության շրջանակներում միասնական քաղաքականության իրականացման մասին:

«Ելնելով միջազգային տնտեսական կառույցների, ինչպես նաեւ Եվրոպական միության հետ Հայաստանի Հանրապետության տնտեսական համագործակցության շրջանակներում պետական մարմինների գործունեությունը համակարգելու եւ ներդաշնակեցնելու անհրաժեշտությունից եւ ղեկավարվելով Հայաստանի Հանրապետության Սահմանադրության 55-րդ հոդվածի 7-րդ կետով` որոշում եմ.

1. Սահմանել, որ Հայաստանի Հանրապետության գործադիր իշխանության մարմինների համակարգում Հայաստանի Հանրապետության միջազգային տնտեսական ինտեգրման եւ բարեփոխումների նախարարությունը հանդիսանում է գլխադասային մարմին՝ սույն հրամանագրի 2-րդ կետով նախարարության համակարգմանը վերապահված հարցերով:

2. Սահմանել, որ Հայաստանի Հանրապետության միջազգային տնտեսական ինտեգրման եւ բարեփոխումների նախարարությունը համակարգում է՝

1) Համաշխարհային բանկի, Արժույթի միջազգային հիմնադրամի, Առեւտրի համաշխարհային կազմակերպության, ինչպես նաեւ այլ միջազգային (տարածաշրջանային) տնտեսական կառույցների եւ միությունների հետ Հայաստանի Հանրապետության իրավասու պետական մարմինների աշխատանքները տնտեսական ոլորտում.

2) Եվրասիական տնտեսական միության հետ Հայաստանի Հանրապետության իրավասու մարմինների աշխատանքները.

3) Հայաստանի Հանրապետության եւ Եվրոպական միության միջեւ տնտեսական համագործակցության շրջանակներում Հայաստանի Հանրապետության իրավասու մարմինների աշխատանքները.

4) Եվրասիական տնտեսական միության եւ Եվրոպական միության հետ իրականացվող տնտեսական քաղաքականության ներդաշնակեցմանն ուղղված՝ Հայաստանի Հանրապետության իրավասու մարմինների աշխատանքները.

5) Եվրոպական հարեւանության քաղաքականության գործողությունների ծրագրից բխող տնտեսական միջոցառումների իրականացումը.

6) Հայաստանի Հանրապետության իրավասու մարմինների կողմից Եվրոպական միության հետ համագործակցության շրջանակներում բարեփոխումներին վերաբերող՝ Հայաստանի Հանրապետության պարտավորություններից բխող տնտեսական միջոցառումների իրականացումը.

7) Եվրոպական միության կողմից տրամադրվող աջակցության եւ Եվրոպական միության գործիքակազմի շրջանակներում նախատեսված տնտեսական ծրագրերի իրականացումը:

3. Սահմանել, որ Հայաստանի Հանրապետության միջազգային տնտեսական ինտեգրման եւ բարեփոխումների նախարարությունը`

1) Հայաստանի Հանրապետության գործադիր իշխանության մարմիններից կարող է ստանալ եւ տրամադրել նյութեր եւ տեղեկատվություն՝ սույն հրամանագրի 2-րդ կետով սահմանված` նախարարության համակարգմանը ենթակա հարցերի վերաբերյալ.

2) կարող է առաջարկություններ ներկայացնել Հայաստանի Հանրապետության վարչապետին եւ գործադիր իշխանության մարմինների ղեկավարներին` նախարարության համակարգմանը ենթակա հարցերին առնչվող առանձին հիմնախնդիրների քննարկման, լուծման ուղիների առաջարկման, համապատասխան ծրագրերի եւ իրավական ակտերի նախագծերի նախապատրաստման համար աշխատանքային խմբեր ստեղծելու վերաբերյալ:

4. Հայաստանի Հանրապետության գործադիր իշխանության մարմիններին`

1) Հայաստանի Հանրապետության միջազգային տնտեսական ինտեգրման եւ բարեփոխումների նախարարության հետ նախապես քննարկել վերջինիս համակարգմանը ենթակա հարցերին վերաբերող ծրագրերը, հանդիպումները, միջոցառումները, ստորագրվելիք փաստաթղթերը, ինչպես նաեւ նախարարությանը գրավոր իրազեկել սույն հրամանագրի 2-րդ կետով սահմանված՝ նախարարության համակարգմանը ենթակա հարցերին առնչվող պայմանավորվածությունների եւ դրանց կատարման ընթացքի վերաբերյալ.

2) նախատեսել Հայաստանի Հանրապետության միջազգային տնտեսական ինտեգրման եւ բարեփոխումների նախարարության ներկայացուցիչների՝ ըստ անհրաժեշտության ներգրավումը վերջինիս համակարգմանը ենթակա հարցերին առնչվող միջգերատեսչական հանձնաժողովների, աշխատանքային խմբերի եւ այլ մարմինների կազմում:

5. Հայաստանի Հանրապետության արտաքին գործերի նախարարին` Հայաստանի Հանրապետության միջազգային տնտեսական ինտեգրման եւ բարեփոխումների նախարարության համակարգմանը ենթակա հարցերով քաղաքականության իրականացման ընդհանուր պատասխանատվությունը դեսպանընկալ պետությունում վերապահել դիվանագիտական ներկայացուցչությունների եւ հյուպատոսական հիմնարկների ղեկավարներին: 6. Հայաստանի Հանրապետության դիվանագիտական ներկայացուցչությունների եւ հյուպատոսական հիմնարկների ղեկավարներին` սահմանված կարգով ընթացք տալ Հայաստանի Հանրապետության միջազգային տնտեսական ինտեգրման եւ բարեփոխումների նախարարության կողմից ներկայացված հարցերին, աջակցել ծրագրերի իրականացմանը, իսկ արդյունքների մասին ողջամիտ ժամկետներում տեղյակ պահել Հայաստանի Հանրապետության միջազգային տնտեսական ինտեգրման եւ բարեփոխումների ու արտաքին գործերի նախարարություններին:

7. Հայաստանի Հանրապետության միջազգային տնտեսական ինտեգրման եւ բարեփոխումների նախարարին` Հայաստանի Հանրապետության Նախագահին եւ Հայաստանի Հանրապետության վարչապետին ներկայացնել տարեկան հաշվետվություն սույն հրամանագրի պահանջների կատարման ընթացքի վերաբերյալ:

8. Սույն հրամանագրի կատարման վերահսկողությունը վերապահել Հայաստանի Հանրապետության Նախագահի աշխատակազմին:

9. Սույն հրամանագիրն ուժի մեջ է մտնում պաշտոնական հրապարակմանը հաջորդող օրվանից»:

ՀՀ Նախագահի աշխատակազմ