Արևելյան երթուղով Չինաստանին ռուսական գազի մատակարարման ծավալը կարող է հասցվել 60 միլիարդ խորանարդ մետրի
Ռուսական РИА Новости լրատվական գործակալության փոխանցմամբ՝ Ռուսաստանն ու Չինաստանը երեկ ստորագրել են գազային հուշագիր: Ըստ դրա՝ Ռուսաստանն արևելյան երթուղով Չինաստանին տարեկան մատակարարելու է 38 միլիարդ խորանարդ մետր գազ, ինչը հնարավոր է հասցվի մինչև 60 միլիարդ խորանարդ մետրի: Այս մասին հայտարարել է ռուսական «Գազպրոմի» ղեկավար Ալեքսեյ Միլերը:
Վերջինիս խոսքերով՝ տվյալ փաստաթուղթն ունի ռազմավարական բնույթ: Դրանով կողմերը որպես Չինաստանին ռուսական գազի մատակարարման առաջնահերթ երթուղի են որակել արևելյան երթուղին, ինչպես նաև հստակեցրել են պայմանագրի տևական ժամկետը (30 տարի՝ սկսած 2018 թվականից): Միլլերը հավելել է, որ «Գազպրոմը» պլանավորել է Չինաստանին գազի մատակարարման մասին երկարաժամկետ պայմանագիր կնքել մինչև ընթացիկ տարեվերջ:
Ավելի վաղ Ռուսաստանն ու Չինաստանը սկզբնական շրջանում համաձայնության էին եկել երկու երթուղով գազի մատակարարման ծավալի շուրջ. արևմտյան երթուղի (Ալթայ նախագիծ)՝ 30 միլիարդ խորանարդ մետր և արևելյան երթուղի (Յակուտիա-Խաբարովսկ-Վլադիվոստոկ)՝ 38 միլիարդ խորանարդ մետր:
