Քիչ անց կվիրահատեն ԱԺ տարածքում վիրավորված Վրեժ Գալստյանին
Այսօր ժամը 15-ի սահմաններում ԱԺ-ի մոտ տեղի ունեցած միջադեպի հետևանքով 1988թ. ծնված Վրեժ Գալստյանը տեղափոխվել է թիվ 1 համալսարանական հիվանդանոց։ Ստացած հրազենային վնասվածքի արդյունքում նրան անհրաժեշտ է վիրահատություն։
Այս մասին 168.am-ի հետ զրույցում ասաց Թիվ 1 համալսարանական հիվանդանոցի Միկրովիրաբուժության ամբիոնի վիրաբույժ Թեհմինե Ասատրյանը։
«Հիվանդը ստացել է հրազենային վնասվածք՝ մուտքով և ելքով։ Այսինքն՝ փամփուշտը մտել է և դուրս է եկել մարմնից։ Վնասվածքը եղել է ազդրի վերին երրորդական հատվածում։ Հրազենային վնասվածքի հետևանքները, բնականաբար, ծանր են և այդ այդ պատճառով է կատարվում վիրահատությունը։ Եթե չվիրահատվի՝ կարող է առաջանալ փտախտի վտանգ»,- ասաց Թ. Ասատրյանը։
Վերջինիս խոսքով, վիրահատությունը կտևի 1.5 ժամ։ Այս պահին հիվանդին կատարել են ցավազրկում, իսկ վիրահատությունը կսկսեն կես ժամից։
