PKK-ն ազատ արձակեց թուրք պատանդներին (լուսանկարներ)
Թուրքական Dünya Bülteni լրատվական կենտրոնի փոխանցմամբ՝ Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) զինյալներն այսօր ազատ են արձակել իրենց մոտ պատանդ պահվող 8 մարդու:
Նրանցից 6-ը զինվորականներ են, մեկը ոստիկան է, իսկ մյուսը՝ պաշտոնյա: PKK-ականները տարբեր ժամկետներում նրանց առևանգել են Դիարբեքիրում, Վանում, Մուշում, Բինգյոլում (Բյուրակն) և Շըրնաքում:
Նրանք շուրջ երկու տարի պատանդ են պահվել Հյուսիսային Իրաքում գտնվող PKK-ի ճամբարներից մեկում: Նրանց ազատ արձակման հարցով միջնորդել է քրդամետ «Խաղաղություն ու ժողովրդավարություն» կուսակցությունը (ԽԺԿ), որի պատվիրակությունն այդ նպատակով մեկնել է Հյուսիսային Իրաք:
Հիշեցնենք, որ PKK-ի հիմնադիր և քուրդ առաջնորդ Աբդուլլահ Օջալանը մարտի 21-ին (Նովրուզ) տեսանյութի միջոցով հնչեցնելու է զինաթափման մասին իր կոչը: Պատանդների ազատ արձակումն իրականացվել է նրա հրահանգով:
