ԵՄ-ը խստացրել է Իրանի դեմ սահմանած պատժամիջոցները
Ռուսական РИА Новости լրատվական գործակալության փոխանցմամբ՝ ԵՄ-ի անդամ 27 երկրների արտգործնախարարներն այսօր Բրյուսելում տեղի ունեցած նիստում որոշել են խստացնել Իրանի հանդեպ գործող պատժամիջոցների ռեժիմը: Այս մասին հայտնել է ԵՄ-ի Խորհրդի մամուլի ծառայությունը:
ԵՄ-ի Խորհուրդը 12 ամսով երկարաձգել է սահմանափակիչ միջոցների գործունեությունը՝ ի պատասխան Իրանում մարդու իրավունքների լուրջ խախտման: Խորհուրդը այդ խախտումների համար պատասխանատու 9 ֆիզիկական անձանց նաև ներառել է այն անձանց ցուցակում, որոնց արգելվել է մուտք գործել ԵՄ և որոնց ակտիվները (ԵՄ-ի տարածքում) սառեցվել են:
Դրանով իսկ ԵՄ-ի «սև ցուցակում» է ընդգրկվել 87 իրանցի: ԵՄ-ի արտգործնախարարները որոշել են նաև սառեցնել իրանական ընկերություններից մեկի ակտիվները, որը պատասխանատու է եղել մարդու իրավունքների խախտման համար: Նոր պատժամիջոցներն ուժի մեջ են մտնելու մարտի 13-ին:
