Սաուդյան Արաբիայում գլխատումը կարող են փոխարինել գնդակահարությամբ
Արաբական «Ալ Արաբիա» հեռուստաալիքի փոխանցմամբ՝ Սաուդյան Արաբիայում դատապարտյալների մի մասի համար գլխատումը կարող են փոխարինել գնդակահարությամբ:
Ներկայումս տվյալ հարցը քննարկվում է հատուկ հանձնաժողովի կողմից, որը ստեղծվել է ներքին գործերի նախարարության, առողջապահության նախարարությունների, դատախազության, անվտանգության ծառայության ու քրեակատարողական համակարգի կողմից:
ՆԳՆ-ն արդեն իսկ երկրի մի շարք նահանգապետներին հրահանգել է գլխատման փոխարեն իրականացնել գնդակահարություն, քանի դեռ այդ հարցը չի լուծվել: Միևնույն ժամանակ նշվում է, որ մահապատժի ենթարկման եղանակների ընտրությունը թողնվելու է նահանգապետների վրա:
Ավելի վաղ Սաուդյան Արաբիայում արդեն իսկ դիմել են գնդակահարության: Այդ եղանակով Խալիլ քաղաքում մահապատժի է ենթարկվել իր ամուսնուն սպանած մի կին:
