Շիրակի մարզի դատախազը պատրաստվո՞ւմ է հրաժարականի իր դիմումը գրել
Շիրակի մարզի դատախազ Դավիթ Սարգսյանը հերքում է իր հնարավոր պաշտոնանկության մասին լուրերը՝ գնահատելով դրանք որպես սուտ լուրեր: «Չի համապատասխանում իրականությանը, նման տեղեկություններ չկան»,- galatv.am– ին ասել է Դավիթ Սարգսյանը՝ պատասխանելով մամուլում շրջանառվող այն տեղեկություններին, համաձայն որոնց` մոտ օրերս աշխատանքից կազատվի Շիրակի մարզի դատախազ Դավիթ Սարգսյանը: Ըստ շրջանառվող տեղեկությունների՝ պատճառն այն է, որ վերջինս տարաբնույթ հարաբերություններ ունի Գյումրու նախկին քաղաքապետ Վարդան Ղուկասյանի հետ, և որ լիարժեք քննություն չի իրականացնում վերջինիս ու նրա որդու հետ կապված գործողությունների մասով:
Հարցին, թե «Ձեզ մեղադրում են Գյումրու նախկին քաղաքապետ Վարդան Ղուկասյանի հետ ինչ-ինչ հարաբերություններ ունենալու մե՞ջ», Շիրակի մարզի դատախազն ասաց. «Ես արդեն ձեզ պատասխանեցի, վերջ, նման բան չկա»:
Ըստ տեղեկությունների՝ դատախազին նաև կասկածում են Գյումրու Գ. Նժեդեհի փողոցում` Շիրակի մարզպետարանի հանդիպակաց մայթին գտնվող բնակելի շենքերի հարևանությամբ Ղուկասյանների կողմից կառուցվող գազալցակայանի փաստի առնչությամբ հարուցված քրեական գործը կասեցնելու փորձերի մեջ:
