«Այդ բռունցքը ջարդելու է քրեաօլիգարխիկ համակարգի ողնաշարը»
ՀՀ նախագահի նախկին թեկնածու Անդրիաս Ղուկասյանը ևս միացավ Ազատության հրապարակում տեղի ունեցող հանրահավաքին: Նա հայտարարեց, որ ամբողջ հայ ժողովուրդն այժմ նայում է այս հրապարակին և ունի մեկ հարց` կա՞ արդյոք կամք այս շարժումը մինչև վերջ տանելու և երկիրը քրեաօլիգարխից համակարգից ազատելու համար:
«Այո, մենք ունենք այդ կամքը և մենք բոլորս դառնում ենք մի բռունցք: Այդ բռունցքը ջարդելու է քրեաօլիգարխիկ համակարգի ողնաշարը»,-հայտարարեց Անդրիաս Ղուկասյանը: Նա նշեց, որ մի քանի օրից ամբողջ ժողովուրդը կլինի հրապարակներում: Անդրիաս Ղուկասյանն ասաց, որ Սերժ Սարգսյանը պարտվել է, և այս անօրինական իշխանությունները պետք է գնան: Նա շեշտեց, որ միայն Սերժ Սարգսյանի հրաժարականը բավարար չէ, ՀՀԿ-ն պետք է հրաժարական տա բոլոր պետական և տեղական ինքնակառամարման մարմիների պաշտոններից: «Մենք պետք է լինենք մեր պետության լիարժեք տերը»,-եզրափակեց Ա. Ղուկասյանը:
