Դատավոր Մենագուլյանի լիազորությունները կարող են դադարեցվել
Արդարադատության խորհուրդն այսօրվա նիստում բավարարել է Կարգապահական հանձնաժողովի կողմից ներկայացված երեք դատավորներին կարգապահական պատասխանատվության ենթարկելու մասին միջնորդությունները:
ՀՀ արդարադատության խորհրդի աշխատակազմի տեղեկացմամբ, ԱԽ-ն որոշել է դիմել Հայաստանի Հանրապետության նախագահին` Երևանի Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարանի դատավոր Ալեքսանդր Մերանգուլյանի լիազորությունները դադարեցնելու միջնորդությամբ: Դատական համակարգի ինտերնետային էջի համաձայն, Վերջինս որպես դատավոր է աշխատում 1999 թվականից, մասնավորապես 1999 թվականից մինչև 2008 թվականն աշխատել է Գեղարքունիքի մարզի առաջին ատյանի դատարանում որպես դատավոր, իսկ 2008 թվականից մինչ օրս Երևան քաղաքի Էրեբունի և Նուբարաշեն վարչական շրջանների ընդհանուր իրավասության դատարանում։
Դատավորի լիազորությունները դադարեցնելու միջնորդությամբ հանդես գալու պատճառների մասին պաշտոնական հաղորդագրությունը չի նշվում։
Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի դատավոր Արմեն Խաչատրյանին հայտարարվել է նկատողություն` զուգորդված 6 ամիս ժամկետով աշխատավարձի 25 տոկոսից զրկելով: Իսկ Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի դատավոր Ալվարդ Հունանյանին հայտարարել նախազգուշացում:
Արդարադատության խորհուրդը հաստատել է Արդարադատության խորհրդի կարգապահական հանձնաժողովի նոր կազմը` Ա. Խաչատրյան – դատավոր, Կ. Բաղդասարյան – դատավոր, Գ. Բադիրյան- իրավաբան-գիտնական` գործունեության ժամկետը սահմանելով 2013 թվականի մարտի 2-ից մինչև 2014 թվականի մարտի 2-ը:
