Գիտնականները պատմել են Չինաստանի վրա նկատված հսկայական կայծակի մասին
Չինացի գիտնականները հրապարակել են հսկայական կայծակի ուսումնասիրության արդյունքները, որը գրանցվել էր 2010 թվականին մթնոլորտի վերին շերտերում՝ Շանդուն երկրամասում։ Աշխատանքը հրապարակվել է Chinese Science Bulletin ամսագրում, իսկ դրա հակիրճ տարբերակը տպագրել է Daily Mail-ը։
Բռնկումը հնարավոր է եղել ֆիքսել նախապես տեղադրված՝ ինֆրակարմիր ալիքներով համալրված տեսախցիկի օգնությամբ։ Գիտնականների խոսքերով` կայծակի վերին սահմանը եղել է երկրի մակերևույթից 89կմ բարձրության վրա, իսկ ներքինը՝ 52կմ։ Արձակված էներգիան գնահատվում է մի քանի միլիոն մեգաջոուլ։
Հսկայական կայծակը, ըստ գիտնականների, հազվադեպ երևույթ է։ Ի տարբերություն սովորական կայծակի՝ այն բռնկվում է ոչ թե փոթորկաբեր ամպերի ներսում կամ նրանց միջև, այլ դրանց վերևում։ Այդ տիպի երևույթները բնորոշ են հիմնականում հասարակածային շրջաններին։
