Սուրեն Խաչատրյան. «Իրանից ոչ մեկը չի հարցնում»
Դե, ես հլը չգիտեմ` ինքը ինչ ա ուզում, ինչ ա ցանկանում, ես ինքս պետք ա ցանկանամ», – «Ազատություն» ռադիոկայանին ասել է Սյունիքի մարզպետ Սուրիկ Խաչատրյանը` մեկնաբանելով իր հետ հանդիպելու մտադրության մասին «Ժառանգություն» կուսակցության առաջնորդ Րաֆֆի Հովհաննիսյանի հայտարարությունը։
«Իրա ցանկությունները դա ցանկություններ են, բայց ես ինքս պետք է ցանկանամ, էլի, թե ե՛ս ինչ եմ ուզում», – հավելել է մարզպետը։
Մարզպետների և մասնավորապես Սուրիկ Խաչատրյանի հրաժարականի` «Ժառանգության» առաջնորդի պահանջի կապակցությամբ էլ Սյունիքի մարզպետը հայտարարեց. – «Դե դեռևս բան չի, որ ինքը ասում ա, էդ ինքը, բան ա, էլի, տենց, կոպիտ ա օրինակը հնչում, ասում ա… Վերջը, հիմա էդ կոպիտ օրինակներով չասեմ ես, դա իրա ցանկությունն ա, իրանից ոչ մեկը չի հարցնում` Սյունիքի մարզպետը հրաժարական կտա, թե Սյունիքի մարզպետը կմնա կաշխատի»։
Հայաստանի նախագահական ընտրություններում պաշտոնական արդյունքներով երկրորդ տեղը գրաված և դրանք վիճարկող Հովհաննիսյանը նախօրեին «Ազատություն TV»-ի ուղիղ եթերում հայտարարել էր, որ այսօր լինելու է Սյունիքի մարզում, որտեղ պահանջելու է մարզպետի հրաժարականը, ինչպես նաև վերջինիս հետ հանդիպում է ակնկալում։
