«Օսկարի» ռեկորդները

Վաղը Լոս-Անջելեսում տեղի կունենա համաշխարհային մշակույթի թերևս ամենահեղինակավոր և դիտարժան իրադարձությունը՝ Ամերիկյան կինոակադեմիայի ամենամյա «Օսկար» մրցանակաբաշխությունը: Այն արդեն 85 տարեկան է, և այս տասնամյակների ընթացքում հասցրել է տարբեր ռեկորդներ սահմանել, որոնք, սակայն, պարբերաբար թարմացվում են:

Ձեզ ենք ներկայացնում դրանցից ամենահետաքրքիրները:

Ամենաշատ մրցանակ ստացած ժապավենները

Երեք ֆիլմ արժանացել է 11-ական Օսկարի: Դրանք են՝

«Բեն-Հուր» (1959),

«Տիտանիկ» (1997),

«Մատանիների տիրակալը. Արքայի վերադարձը» (2003):

Սակայն միայն վերջինն է, որ հաղթել է բոլոր 11 անվանակարգերում, որոնցում եղել է ներկայացված:

Ամենաշատ անվանակարգերում ներկայացված ժապավենները

Երկու ֆիլմ Օսկարի է ներկայացվել 14-ական անվանակարգերում: Դրանք են՝

«Ամեն ինչ Եվայի մասին» (1950),

«Տիտանիկ» (1997):

Մեկ անձի ստացած ամենաշատ մրցանակները

Ուոլտ Դիսնեյն արժանացել է 22 Օսկարի, ընդ որում, չորսը՝ մի տարվա ընթացքում:

Ամենաշատ մրցանակ ստացած դերասաններն ու դերասանուհիները

Քեթրին Հեփբերն – 4 Օսկար (բոլորը՝ «Լավագույն դերասանուհի»),

Մերիլ Սթրիփ – 3 Օսկար (2-ը՝ «Լավագույն դերասանուհի», 1-ը՝ «Երկրորդ պլանի լավագույն դերասանուհի»),

Ինգրիդ Բերգման – 3 Օսկար (2-ը՝ «Լավագույն դերասանուհի», 1-ը՝ «Երկրորդ պլանի լավագույն դերասանուհի»),

Ջեկ Նիկոլսոն – 3 Օսկար (2-ը՝ «Լավագույն դերասան», 1-ը՝ «Երկրորդ պլանի լավագույն դերասան»),

Ուոլտեր Բրենան – 3 Օսկար (բոլորը՝ «Երկրորդ պլանի լավագույն դերասան»):

Ի դեպ, Մերիլ Սթրիփն ամենաշատն է ներկայացված եղել Օսկարի՝ 17 անգամ: Այս ցուցակն այս տարի հավանաբար կհամալրի Դենիել Դեյ-Լյուիսը: Օսկարի արժանանալու դեպքում նա կդառնա միակ եռակի օսկարակիր դերասանը, ով բոլոր մրցանակները ստացած կլինի «Լավագույն դերասան» անվանակարգում:

«Մեծ հինգ մրցանակների» (լավագույն ֆիլմ, ռեժիսոր, դերասան, դերասանուհի, սցենար) արժանացած ժապավենները

«Դա պատահեց մի գիշեր» (1934),

«Թռիչք կկվի բնի վրայով» (1975),

«Գառնուկների լռությունը» (1991):

Ամերիկյան կինոակադեմիայի ռեկորդների ամբողջական ցուցակը՝ այստեղ:

Թոմսոն