ԲՀԿ-ն ընտրությունների վերաբերյալ գնահատական դեռևս չունի
«Բարգավաճ Հայաստան» կուսակցությունը քաղաքական որոշում էր կայացրել չմասնակցել ՀՀ նախագահի 2013թ. ընտրություններին որևէ ձևաչափով: Անկախ քաղաքական այս գնահատականից, ԲՀԿ տարբեր գործիչներ արտահայտեցին իրենց դիրքորոշումը, որ սատարում են գործող նախագահ, ՀՀԿ թեկնածու Սերժ Սարգսյանին: ԲՀԿ-ում սա համարեցին «նորմալ»՝ բացատրելով, որ իրենք «ընտրազանգվածին» թողնում են ազատ կողմնորոշվելու՝ ընտրել այս կամ այն ծրագրի օգտին:
Իսկ ո՞րն է ԲՀԿ-ի քաղաքական գնահատականը ՀՀ նախագահի ընտրություններին: ԲՀԿ մամլո խոսնակ Տիգրան Ուրիխանյանը ԳԱԼԱ-ի այս հարցին պատասխանել է. «Մեկնաբանություններ չունեմ: ԲՀԿ-ն ձեռնպահ է մնում այդ հարցի շուրջ մեկնաբանություններ անելուց»,- ասել է Տ. Ուրիխանյանը:
Հարցին, թե ԲՀԿ քաղխորհուրդը կկայացնի՞ որոշում՝ հանդես գալ մեկնաբանությամբ, կգնահատի՞ անցած ընտրությունները, ԲՀԿ մամլո խոսնակն ասաց. «Ես պիտի էլի նույն կերպ պատասխանեմ՝ որևէ մեկնաբանություն այս հարցի հետ կապված չունեմ:
Եթե ինձ հանձնարարվեց ինչ- որ տեղեկատվություն, ես հայտարարություն կանեմ»:
Փոխարենը ԲՀԿ գործիչները բոլորովին տարբեր գնահատականներ տվեցին անցած ընտրություններին: ԲՀԿ-ական Վարդան Բոստանջյանի կարծիքով՝ ընտրությունները խիստ մրցունակ էին, եւ ամեն ինչ անցել է օրինականության սահմաններում:
Իսկ գյումրեցի ԲՀԿ-ական Ռոբերտ Զաքարյանը ընտրությունները բնորոշեց այսպես. «Շատ վատ, դուք ինձնից լավ գիտեք, շատ խարդախ ընտրություններ էին»:
