Իրանն առաջարկում է ստեղծել Նավթաքիմիական արտադրանք արտահանող երկրների կազմակերպություն
Neftegaz.ru-ի փոխանցմամբ՝ Իրանն առաջարկում է ստեղծել Նավթաքիմիական արտադրանք արտահանող երկրների կազմակերպություն: Այս մասին հայտարարել է Իրանի նավթարդյունաբերության փոխնախարար, Իրանի Ազգային նավթաքիմիական արդյունաբերության գլխավոր տնօրեն Ա« Բայաթը:
Վերջինիս խոսքերով՝ անհրաժեշտություն է առաջացել ստեղծել այնպիսի միջազգային կազմակերպություն, որը կվերահսկի նավթաքիմիական միջազգային շուկաներում առկա իրավիճակը, և դրա հետ կապված՝ Իրանն արդեն մի շարք երկրների առաջարկել է ստեղծել Նավթաքիմիական արտադրանք արտահանող երկրների կազմակերպություն:
Բայաթը հավելել է, որ այդ կառույցը նման կլինի Նավթ արտահանող երկրների կազմակերպությանը (OPEC) կամ Գազ արտահանող երկրների ֆորումին (GECF): Բայաթն ընդգծել է, որ Իրանը՝ որպես Մերձավոր ու Միջին Արևելքում նավթաքիմիական արտադրանքի խոշորագույն արտադրող, պատրաստ է սերտորեն համագործակցել նավթաքիմիական այլ արտադրողների հետ տարածաշրջանում և համայն աշխարհում:
Ներկա դրությամբ Իրանի նավթաքիմիական արդյունաբերության հզորությունը կազմում է տարեկան 57 միլիոն տոննա: Պլանավորված է այդ ցուցանիշը հասցնել տարեկան մինչև 100 միլիոն տոննայի:
