Վախճանվել է օլիմպիական չեմպիոն Վլադիմիր Ենգիբարյանը

2013թ. փետրվարի 1–ի առավոտյան Լոս Անջելես քաղաքում 81 տարեկան հասակում կյանքին հրաժեշտ է տվել Մելբուռնի օլիմպիական խաղերի չեմպիոն, Եվրոպայի եռակի  և ԽՍՀՄ բազմակի չեմպիոն Վլադիմիր Նիկոլայի Ենգիբարյանը:

Նա ծնվել է 1932 թ. ապրիլի 24–ին` Երևանում: 1959թ. հիմնադրել է Երևանի պատանի բռնցքամարտիկների հանրապետական դպրոցը, որի անփոփոխ տնօրենն էր մինչև 1995թ. , երբ բնակության տեղափոխվեց ԱՄՆ:

Վլադիմիր Ենգիբարյանը  արժանացել է ԽՍՀՄ սպորտի վաստակավոր վարպետի կոչման, մարզաձևի միջազգային ֆեդերացիայի անդամի, ԽՍՀՄ Աշխատանքային կարմիր դրոշի շքանշանի, ՀՀ վաստակավոր մարզչի և վաստակավոր գործչի, ՀԱՕԿ–ի ոսկե շքանշանի:

ՀՀ նախագահը և ԼՂՀ  նախագահը  Վլադիմիր Ենգիբարյանին  շնորհել են  /2009 թ./ Հայաստանի և Արցախի բարձրագույն պարգևներ:

Ենգիբարյանի 80–ամյակին նվիրված տոնական արարողությունն անցած տարի նշվել է Երևանում, իսկ բռնցքամարտի դպրոցն անվանակոչվել է Վլ. Ենգիբարյանի անունով:

Հայաստանի ազգային օլիմպիական կոմիտեն  փետրվարի 3–ին, ժամը 14–ին հոգեհանգստյան  արարողություն է կազմակերպելու Սուրբ Սարգիս եկեղեցում: Հուղարկավորությունը  նախատեսված  է ԱՄՆ –ում:

SportArmenia-ն ցավակցում է Վլադիմիր Ենգիբարյանի ընտանիքին աշխարհահռչակ մեր մարզիկի մահվան կապակցությամբ։

Մարզական լրահոսն ապահովում է SportArmenia.com-ը