Չինացի ցանցահեններն աշնանից գրոհում են ամերիկյան The New York Times թերթը
Բրիտանական Reuters լրատվական գործակալության փոխանցմամբ՝ ամերիկյան The New York Times թերթը 4 ամիս շարունակ ենթարկվում է չինացի ցանցահենների հարձակումներին: Դրանք կարող են պայմանավորված լինել ամերիկյան թերթում Չինաստանի վարչապետի ազգականների «քողարկված հարստությունների» մասին հոդվածի հրապարակմամբ:
2012 թվականի հոկտեմբերի վերջին The New York Times-ում հրապարակված հոդվածում նշված էր, որ Չինաստանի վարչապետ Վեն Ցզյաբաոյի ազգականենրը վերահսկում են ավելի քան 2.7 միլիարդ դոլարի ակտիվներ: Բացի այդ, նշված էր, որ Ցզյաբաոն անձամբ բավական հարստացել է վարչապետի պաշտոնը զբաղեցնելուց հետո:
Այս հրապարակումից հետո թերթը շարունակ ենթարկվում է չինացի ցանցահենների հարձակումներին: Նրանք ներթափանցում են թերթի համակարգչային համակարգերի մեջ և ձեռք են բերում նրա լրագրողների ու այլ աշխատակիցների գաղտնաբառերը: Ցանցահեններն այդ գաղտնաբառերն օգտագործել են Ցզյաբաոյի մասին հոդվածի վերաբերյալ տեղեկատվություն որոնելու համար:
Ամերիկյան թերթը մասնագետներ է վարձել՝ ընդդեմ այդ հարձակումների, որոնք էլ պարզել են, որ հարձակումներն իրականացվում են Չինաստանից: Չինաստանի իշխանությունները հերքում են ցանցահենների օգնությանը դիմելու մասին ամեն տիպի մեղադրանքները՝ ընդգծելով, որ իրենք անձամբ են հաճախակի դառնում կիբեր հանցագործների զոհ:
