Գերմանական ընկերությունը դուրս է եկել Nabucco-ից
Ադրբեջանական Turan լրատվական գործակալության փոխանցմամբ՝ Nabucco Gas Pipeline International GmbH (NIC) ընկերությունը հուսով է, որ վերջին հաշվով Nabucco կոնսորցիումի կազմում կլինի 9-10 բաժնետեր: Այս մասին հայտարարել է կազմակերպության գործադիր տնօրեն Ռեյնհարդ Միտչեկը.
«Բաժնետերերի հարցը վերանայվելու է 2013 թվականի առաջին կեսին՝ անգամ խողովակաշարի երթուղու ընտրությունից հետո: Գերմանական RWE ընկերությունը որոշել է դուրս գալ նախագծից: Դրա համար էլ Nabucco West-ի բաժնետերերը նախագծում ներգրավում են ադրբեջանական «Շահ Դենիզ» գազայաին հանքավայրի մշակման նախագծի բաժնետերերին»:
Հիշեցնենք, որ Nabucco կոնսորցիումն ու «Շահ Դենիզ» կոնսորցիումը հունվարի 18-ին Վիեննայում ստորագրել են համագործակցության, ինչպես նաև համատեղ ֆինանսավորման ու սեփականացման մասին համաձայնագիր: «Շահ Դենիզ» կոնսորցիումը պետք է կողմնորոշվի, թե որ երթուղով պետք է ադրբեջանական գազը հասնի Եվրոպա:
Եթե կոնսորցիումը նախընտրի Nabucco West գազատարի տարբերակը, ապա կոնսորցիումի մեջ մտնող ընկերությունները (SOCAR, BP, Statoil և Total) իրավունք կստանան տիրել այդ նախագծի 50 տոկոսին:
