19 դատախազ խիստ նախազգուշացվել է
Ի կատարումն «Հայաստանի Հանրապետության անկախության հռչակագրի 20-րդ տարեդարձի կապակցությամբ համաներում հայտարարելու մասին» ՀՀ ԱԺ որոշման կիրառման արդյունքում ծագած խնդիրները ուսումնասիրելու ՀՀ նախագահի 2011 թվականի դեկտեմբերի հանձնարարականի` դատախազությունն ամփոփել է թույլ տրված թերություններն ու խախտումները։
Մասնավորապես ՀՀ գլխավոր դատախազության կազմակերպավերահսկողական վարչությունն ուսումնասիրել է նախաքննության և հետաքննության մարմինների, դատարանների կողմից կայացված որոշումների, դրանց վերաբերյալ քրեական գործերի վերանայման նպատակահարմարության, այդ որոշումների հնարավոր վերացման կամ բողոքարկման, համաներման որոշման կիրառման ընթացքում թույլ տրված թերությունների, բացթողումների և խախտումների դեպքում մեղավոր անձանց նկատմամբ ձեռնարկված միջոցառումների արդյունքները, ինչը քննարկվել է ՀՀ գլխավոր դատախազության 2012 թվականի դեկտեմբերի 21-ին տեղի ունեցած կոլեգիայի նիստում։
Ինչպես տեղեկացրեց ՀՀ գլխավոր դատախազի խորհրդականը, ուսումնասիրության արդյունքներով հարուցվել է 10 կարգապահական վարույթ և 10 ուսումնասիրություն, որի արդյունքներով 9 դատախազի նկատմամբ նշանակվել են կարգապահական տույժեր, իսկ 19 դատախազ խիստ նախազգուշացվել և նրանց ուշադրությունը հրավիրվել է համաներման որոշման կիրառման ընթացքում նրանց կողմից թույլ տրված թերությունների, բացթողումների ու խախտումների վրա` անհրաժեշտ հետևություններ անելու և այսուհետ դրանք բացառելու համար:
Կոլեգիայում տեղի ունեցած քննարկումների արդյունքներով հանձնարարվել է տարածքային և կառուցվածքային ստորաբաժանումները ղեկավարող դատախազներին՝ առանձնակի ուշադրություն դարձնել համաներման որոշման պատշաճ կիրառելու վրա՝ խուսափելով իրավական նորմերի տարածական կամ սահմանափակ մեկնաբանման հնարավոր դրսևորումներից։
