Քրդական կուսակցությունը Հրանտ Դինքի սպանության վերստին հետաքննման միջնորդագիր է ներկայացրել խորհրդարան
Թուրքական Milliyet թերթի փոխանցմամբ՝ քրդական «Խաղաղություն ու ժողովրդավարություն» կուսակցության փոխնախագահ Իդրիս Բալուքենի ու նրա ընկերների ստորագրությամբ միջնորդագիր է ներկայացվել խորհրդարանին: Դրանում խոսք է գնում Հրանտ Դինքի սպանության հետաքննության անհրաժեշտության մասին:
Միջնորդագրում ուշադրություն է հրավիրվում նրա վրա, որ Դինքի սպանության ժամանակ ցուցաբերած անփութության ու կանխամտածված թողտվության համար հետաքննություն չի սկսվել որևէ պաշտոնյայի նկատմամբ: Միջնորդագրում ասվում է, որ սպանությանը հաջորդած դատական գործընթացում թույլ տված խտրական մոտեցումը խոր հետք է թողել հասարակության խղճի վրա:
Միջնորդագրում ցանկություն է հայտնվում արդարության հաստատման, դատական համակարգի խնդիրների հաղթահարման, սպանության խոր կապերի բացահայտման նպատակով խորհրդարանի կողմից նոր հետազոտություն սկսելու մասին:
Հիշեցնենք, որ Հրանտ Դինքը սպանվել է 2007 թվականի հունվարի 19-ին, Ստամբուլի Շիշլի թաղամասում:
