Ճապոնիան մտադիր է ուղեծիր դուրս բերել 6 հետախուզական արբանյակ
Ռուսական ИТАР-ТАСС լրատվական գործակալության փոխանցմամբ՝ Ճապոնիայի կառավարությունը որոշել է առաջիկա հինգ տարում ուղեծիր դուրս բերել օպտիկական ու ռադարային դիտարկման 6 հետախուզական արբանյակների խումբ: Այն հնարավորություն կտա անհրաժեշտության դեպքում օրական երկու անգամ լուսանկարներ և այլ տեղեկատվություն ստանալ մոլորակի մակերևույթի յուրաքանչյուր կետի մասին:
Առաջին արբանյակն ուղեծիր կարձակվի արդեն ամսվա վերջին: Ներկայումս Տոկիոն արդեն իսկ ունի 4 հետախուզական արբանյակ, որոնք գերազանցապես հետևում են Հյուսիսային Կորեային: Սակայն Ճապոնիայի կառավարությունը կարծում է, որ դրանց տիեզերական հետևման հնարավորությունները նախկինի նման բավական չեն, ինչի համար էլ նա հիմնականում ստիպված է լինում ապավինել ԱՄՆ օգնությանը: Տիեզերքից արված ամերիկյան լուսանկարներն իրենց որակով ու ճշգրտությամբ գերազանցում են ճապոնական լուսանկարները:
Նոր արբանյակները Տոկիոն մտադիր է գործածել նաև տեղանքի քարտեզի կազման, օգտակար հանածոների փնտրման, ինչպես նաև բնական աղետների կանխման համար:
