Սամբոյի ֆեդերացիան առաջիկա ընտրություններին սատարում է Սերժ Սարգսյանին
Հայաստանի սամբոյի ֆեդերացիայի գործկոմի 2013թ. հունվարի 15-ի նիստում, ի շարս կազմակերպչական և ուսումնամարզական հարցերի, քննարկվել է նաև փետրվարի 18-ին անցկացվելիք ՀՀ նախագահի ընտրության հարցի շուրջ ֆեդերացիայի անդամների քաղաքացիական դիրքորոշման հարցը:
«Արմենպրեսի» սամբոյի ֆեդերացիայի գործկոմից տեղեկացրել են, որ կարծիքների փոխանակումից հետո գործկոմի անդամները գրեթե առանց բացառության որոշում են կայացրել ընտրություններում քվեարկել գործող Նախագահ Սերժ Սարգսյանի օգտին` հաշվի առնելով ոչ միայն նախագահի քաղաքական փորձառությունը, հարուստ կենսագրությունն ու տարվող ներքին և արտաքին քաղաքականությունը, այլև Սերժ Սարգսյանի՝ հայկական սպորտի հանդեպ ցուցաբերած տևական սրտացավ ու մտահոգ վերաբերմունքը:
«Հայկական սամբոյի «բազմահազարանոց ընտանիքը» համոզված է, որ Սերժ Սարգսյանն ի զորու է առաջիկա հինգ տարիներին ղեկավարել հայոց պետությունն այնպես, որպեսզի երկիրը զարգանա, ժողովուրդն էապես զգա կյանքի պայմանների բարելավումը, հայկական սպորտն էլ, այդ թվում սամբո մարզաձևը, շնորհիվ ջերմ և հատուկ ուշադրության, միջազգային ասպարեզներում արձանագրի նոր և ավելի մեծ բարձունքներ՝ ի փառս Հայաստան երկրի և հայ ժողովրդի»,- ասվում է հայտարարության մեջ:
