ԵՄ-ը ողջունել է Ղարաբաղյան հակամարտության վերաբերյալ ԵԱՀԿ գործող նախագահի հայտարարությունը
Ադրբեջանական APA լրատվական գործակալության փոխանցմամբ՝ ԵՄ-ը ողջունել է ԵԱՀԿ գործող նախագահ Ուկրաինայի այն հայտարարությունը, որ վերջինս աջակցելու է ԵԱՀԿ Մինսկի խմբի ջանքերին և օգնելու է հակամարտող կողմերին՝ Ղարաբաղյան հակամարտության խաղաղ կարգավորումը գտնելու համար:
Այս մասին նշված է երեկ ԵԱՀԿ Մշտական խորհրդի նիստում ԵՄ-ի անունից ընթերցված հայտարարությունում: Դրանում նաև ասվում է. «ԵՄ-ը վերստին հայտարարում է ԵԱՀԿ Մինսկի խմբի իր աջակցության մասին և հաստատում է դանում համանախագահող երկրների հանդեպ տածած ամբողջական վստահությունը, որ նրանք ունակ են առաջ ընթանալ Ղարաբաղյան հակամարտության ամուր կարգավորման ուղիների փնտրտուքի հարցում, ինչը կենսական կարևորություն ունի տարածաշրջանի ապագայի համար»:
Հիշեցնենք, որ ԵԱՀԿ գործող նախագահ, Ուկրաինայի արտգործնախարար Լեոնիդ Կոժարը, երեկ Վիեննայում հանդես գալով կազմակերպությունում Ուկրաինայի նախագահության սկսման միջոցառման ժամանակ, հայտարարել էր, որ իրենք պետք է շարունակեն ԵԱՀԿ Մինսկի խմբի բազմամյա ջանքերը և օգտագործեն բոլոր հնարավորությունները՝ հակամարտող կողմերի հետ բանակցություններ վարելու համար:
Նա հավելել էր, որ Ուկրաինան աջակցում է ԵԱՀԿ Մինսկի խմբի ջանքերին և հակամարտության կարգավորման շուրջ խաղաղության բանակցությունների հետագա անցկացմանը:
