«Գերմանական» Patriot-ները Թուրքիա կհասնեն հունվարի 21-ին
Թուրքական Cihan լրատվական գործակալության փոխանցմամբ՝ Թուրքիային Գերմանիայի տրամադրած երկու միավոր Patriot զենիթա-հրթիռային համալիրները երկուշաբթի առավոտյան կհասցվեն Միջերկրական ծովի ափին ընկած Իսքենդերունի նավահանգիստ:
Այս մասին հայտարարել է Թուրքիայում Գերմանիայի դեսպանատունը: Այդ համակարգերը փոխադրող նավերը Գերմանիայի հյուսիսում ընկած Լյուբեկ նավահանգստից մեկնարկել են հունվարի 8-ին:
Հիշեցնենք, որ 2012 թվականի դեկտեմբերի կեսերին Գերմանիայի խորհրդարանը հաստատել էր Թուրքիա Patriot զենիթա-հրթիռային երկու համալիր և դրանց սպասարկման համար 350-400 զինծառայող ուղարկելու մասին օրինագիծը: Քվեարկությանը մասնակցած 555 պատգամավորներից 461-ը կողմ էր քվեարկել դրան, 86-ը՝ դեմ, իսկ 8-ը՝ ձեռնպահ էր մնացել:
