Տավուշի մարզում հայտնաբերվել է հրազենային վնասվածքից մահացած տղամարդու դի
Երեկ՝ հունվարի 17-ին, ժամը 22:30-ի սահմաններում, Ոստիկանության Տավուշի մարզային վարչություն և ոստիկանության Տավուշի բաժին ահազանգ է ստացվել, որ Նավուր գյուղին պատկանող «Քոսականց կապեր» կոչվող հանդամասում տղամարդու դի կա: Այս մասին հաղորդում է shamshyan.com կայքը:
Ֆոտոլրագրող Գագիկ Շամշյանը հայտնում է, որ Օպերատիվ քննչական խումբը հանդամասում հայտնաբերել է Բերդ քաղաքի Սարալանջի փողոցի բնակիչ 1961թ. ծնված Սերոժ Հովհաննիսյանի դին՝ աջ ազդրի մասում թափանցող հրազենային վնասվածքի հետքով:
Դեպքի մասին ոստիկաններին ահազանգել է Արծվաբերդի անտառապետության Նավուրի պահաբաժնի անտառապահ 33-ամյա Կարեն Ջուլհակյանը: Փաստի առթիվ ոստիկանության քննչական գլխավոր վարչության Տավուշի մարզի քննչական բաժնում նյութեր են նախապատրաստվում:
